District tinah Digital India Week hawng

Nimin khan Mizorama district khawpui tinah Digital India Week hawnna inkhawm neih a ni. Digital India Week hi July 1-7 chhung hman a ni ang.

Lungleiah chuan DC Office Complex-ah hawnna in­khawm neih niin, Lunglei addi­tional DC H Lianzela'n e-District Facilitation Centre leh Con­tent Management Software for District Administration a hawng. Week pualin YMA sub-headquarters YMA office confe­rence hall-ah 'Social Media & Cyber Security’ tih thupui hmangin seminar neih a ni.

Saihaah chuan DC pisa conference hall-ah hawn a ni a; SDO Marilyn Rualza­khum­thangi'n kaihhruain, khual­lian R Zarzosanga, Saiha DC-in thu a sawi. Chawhnu lamah seminar neih a ni a, e-District manager ZF Rokima'n thupui, 'Cyber Security and Media Security' tih a sawi.

Lawngtlaiah pawh DC pisa conference hall-ah hawn a ni a, Lawngtlai DC J Hming­thanmawia khuallian a ni. Lawng­tlai additional SP KL Vul­mawia'n thupui a sawi a, SDC ST Lalvensangi'n e-District hna­thawh dan sawifiah bawk. He hunah hian Region Higher Secondary School zirlaite leh chanchinbumite an tel a ni.

Serchhipah chuan DC pisa conference hall-ah buatsaih a ni a, additional DC VL Remliana'n a hawng. Serchhip district informatics officer Lalruatmawia Zadeng-in Digital India Project chungchang a sawifiah a; e-District manager Lalhruaitluanga Sailo-in thupui a sawi.

Mamitah chuan Digital India Week pualin Mamit DC pisa bula e-District leh State Data Centre chu additional DC Lalbiaksangi'n a hawng. Hawnna inkhawm neih zawhah DC conference hall-ah inkhawm neih a ni a, e-District manager Lalremmawia'n e-District nihphung a sawifiah. Seminar neih zui a ni a, Mamit IPRO JH Lalparmawii'n kaihruaiin, SDC Victor Lalawmpuia SDC leh SDPO PC Lalṭanpuia ten thupui an sawi.

Kolasib-ah pawh DC Con­ference Hall-ah Digital India Week pualin hun hman a ni a; DC Jitender Yadav-a'n Kolasib DC pisaa e-District Centre leh State Service Delivery Gateway a hawng.

Champhaiah chuan e-District office, Keifangtlangah hun hman a ni a, chawhma lamah additional DC R Vanlalsawta'n e-District leh State Data Centre a hawng. Chhunah Champhai College-ah e-District leh Social Media & Cyber Security chungchang zirhona buatsaih a ni a; e-District manager Malsawmtluanga leh NIC-a assistant engineer Zairimawia ten thupui an sawi. Champhai district-ah hian Common Service Centre (CSC) 49 a awm mek a ni.

e-District hnuaiah hian a kaihhnawih sorkar department (line department) pakua aṭangin service chi hrang 32 dah tura duan a ni a; State Portal hnuaia hian line department pasarihte thlunzawm a ni bawk.