Home leh IPR-te ṭha lehzuala thawhho tum

Home department leh Information & Public Relations department hotute chu nimin khan IPR secretary Rosangpuii pisaah an inkâwm a, mipui tana rawngbawlna kawngah ṭha lehzuala thawhho ni se an ti.

IPR Secretary chuan, an department chu sorkar kaihza vénga fimkhur leh dik taka thu kal lam leh haw lam mipui hnena an puanzar ṭhin dan a sawi a; Mizoram police-te'n sual dona leh misual man kawnga an hnathawhte vantlang hriata puanzar danah thudik leh belhchian dâwl pek chhuah a nih theih nan fimkhur taka inráwn tawn ṭhin ni se ṭha a tih thu a sawi.

Meeting-ah hian, sualna dona thawhho dan tur te, hnam leh hnam leh chi leh chi inkara innghirnghona chawk tho thei thil thleng a awma fimkhur a ngaih thute an sawiho a; mipuiin innghahna tlak thu dik rang taka an hriat theih nan leh rin thu leh a ṭha lo zawnga mi rilru chawk tho thei thu vawrh darh a nih loh nante ṭan lak ni se, an ti.

Social media lama thu belhchian dâwl lo leh mi rilru tina thei thehdarh a awm ṭhin chu pawi an tih thu an sawi a; social media hman danah fimkhur turin mipuite an ngen a ni.