Covid-19 laka mipui himna turin Sorkarin theihtawp a chhuah - MNYF

Mizo National Youth Front (MNYF) chuan Inrinni khan Aizawl Press Club-ah thuthar thehdarhtute an kâwm a; Covid-19 laka mipui him theihna turin Mizoram sorkarin theihtawp a chhuah thu an sawi.

MNYF vice president Lalzahawma Khiangte chuan, Covid-19 chungchangah tlawmngai pawl, kohhran leh mipui thlàwpna hnuaiah ram mipui himna turin sorkarin theihtawpa a chhuah nia sawiin, "Mipui kan himna turin Covid-19 test pawh hautak hle mah se, Vairengte leh Kânhmunahte ram páwn aṭanga lo lut turte test ṭhin a ni," a ti.

Lalzahawma Khiangte chuan, Covid-19 test kalpui dan turah kalphung fel tak siam a nih thu sawiin, "Hri léng hian eng chen nge a awh dawn a hriat loh avangin sum leh pai renchem taka hmangin, Covid-19 test chungchangah pawh a thlàwna test dan tur te, subsidy-a test dan tur leh a man pangngaia test dan turte a siam a ni," a ti a; ruahmanna a fel avangin test tawh zinga 99% chu a thlàwna test a nih thu a sawi.

State tam takah Rapid Antigen Test (RAT) man chawia an kalpui laiin, Mizoramah chuan a thlàwn liau liauin tun thlengin kalpui zel a ni tih sawiin Lalzahawma chuan, "Hei hi state chhunga hri darh tur vengtu pawimawh ber pakhatah kan ngai," a ti.

MNYF hruaitute chuan, Congress ṭhalai chu ram dinhmun thlir loah puhin, "An sorkar laia thisen lâkna man a thlàwna ti thei lote'n kan sorkarin a kalpui dan an sawisel hi a zah theih loh thlak hle. MPYCC President-in thuthar thehdarhtute hnena RT-PCR test man Rs. 4,500 hmang anga a sawi hi thil a hre chiang lo hle. Rs. 4,500 cháwi turte hi mahni duh thua test-te leh Covid free certificate dilte tan a ni a, a dang chu subsidised leh free test vek a ni," an ti.

Mizorama hri leng chu ram dang leh state dang nena tehkhinin, a ném (moderate) hlea an hriat thu sawiin MNYF chuan, "Kohhran mite'n nasa taka Pathian an auhna rahah kan ngai. VC/LC inthlana MNF chêt ṭhat chhan pawh mipuiin Covid-19 donaa sorkar hmalakna an rin tâwkzia an lantirnaah kan ngai," an ti a; India rama Covid-19 dona kawnga ti ṭha lawmman pek tur ni se, Mizoram chu a dawng hmasa ber a nih an rin thu an sawi.

MNYF hruaitute chuan, ZLP leader Lalduhoma'n Covid-19 dona kaihhnawiha Mizoram sorkarin sum a hman theih tur cheng vbc. 1061.03 a hmuh tawh thu, September 17-a a sawi chungchangah, "Budget a hre chiang lo hleah kan ngai. Sorkar sum hmuhna a rawn sawi zinga pakhat SDRF first instalment cheng nuai 2,350 hi a vaia Covid-19 dona atana hman tur anga a rawn sawi hi mipui bum tumnaah kan ngai," an ti.