Nilaini zana mi sâttute jail-ah dah lut

July 1 zan dar 11 vel khan 407 truck pakhata chuang mi pathumin Zarkawta Hotel Regency zawn kawngpuiah mi tibuaiin, chemin mi pahnih an sât. Mi pathumte hi man an ni a, nimin khan jail-ah dah luh nghal an ni. An mi sahte chu Aizawl Civil Hospital-ah dah luh an ni.

Police aṭanga thu dawn danin, pawi khawih­tute hi Immanuel Lalbiak­ngheta (22) s/o F Ro­khuma, Chawngtlai; Lal­ngur­muana (28) s/o F Ro­­khuma, Chawngtlai leh, Laldinpuia (23) s/o J Rinmawia, Kawrte­thaw­veng-te an ni a, Aizawl Chawnpui venga khawsa mek an ni.

Thu dawn danin, 407 truck-in a hmaa car tlân chak taka lehpelh a tum laiin anmahni tâwka zawnga tlan bike nen an intái thuak a, chu'ng thil thleng vel aṭang chuan inhnial buaiin tharum an thawh ta a ni. Truck-a chuang mi pathumte chuan truck aṭangin chem pahnih leh lever an chuh a, an hmuh remchante chu an sât ta mai niin an sawi.

Mi pathumte chuan Lalruatfela s/o K Than­khuma, Khawhai leh Lalengmawia s/o Zothan­puia, Chawlhmun-te an sat a; Hotel Regen­cy-a thawk pakhatin hliam tenau a tuar bawk.

Pawi khawihtute hi a bul hnaia awmte'n an man a, police kutah an hlan. Police-te chuan nimin khan Court-ah an hruai a, Court phalnain jail-ah nimin vêk khan dah luh an ni.

Pawi khawihna thleng chungchangah Chawngtlai Welfare Committee, Aizawl chuan thuchhuah siamin, mawi lo leh zahpuiawm taka Lalngurmuana leh Immanuel Lalbiakngheta te an khawsa chu zahthlak an tih thu leh an dem thu an tarlang.

Khawhai Youth Movement, Aizawl pawhin thuchhuah siamin, an khaw mi Lalruatfela leh Lalengmawia, Chawlhmunte sâttute chu a na thei ang bera hrem ni se an duh thu an tarlang a; hliamte enkawlna zawng zawng tumsak tur leh zangnadawmna pe ngei turin pawi khawihtute an phût bawk.