Covid-19 vei pun chhan sorkarin a tih tur a tih loh vang: Congress party

Mizoram Pradesh Congress Committee (MPCC) Communication department chuan thu­chhuah siamin, Mizorama Covid-19 vei an pun chhan chu, mipui inthlahdah vang ni loin, state sorkarin a tih tur a tih loh vang a nih thu an tarlang.

MPCC chuan, hripui vei an pun chhan chu mipui inthlahdah vang angin Health Minister-in a sawi niin an tarlang a, "A lungchhiatthlak hle. MNF sorkar hian a hmalak dan ngun takin ngaihtuah se la, hun lo taka village/local council inthlan buatsaihtu sorkar hian a tih tur a ti em tih inzawt rawh se," an ti.

India rama Covid-19 a darh ṭan tirh aṭangin MNF sorkar finchhuah tumin theihtawpin hma an la nia sawiin MPCC chuan, "Zoram mipui kan him theihna tura thil ṭul tam tak awmte puangin, BSL-3 emaw BSL-2 laboratory tal Mizoram sorkar hian siam/nei se, tiin thla sarih liam ta khan sorkar kan lo ngen tawh. Thla sarih hnuah pawh mumal zawk leh felfai zawka Covid-19 test-na tur hmun kan la nei chuang lo," an ti a; TB research tihna atana siam laboratory phuahchawp tak bâk chu siam belh a la awm tih an sawi.

Congress party chuan, Mizoramah swab test tihna a la indaih lo hle nia sawiin, "Heti khawpa indaih lo chung siin CLP leader Pu Zodintluanga'n MLA fund hmanga a lei lah, hman chu sawi loh, a hawn pawh an la hawng duh lo. USA siam RT-PCR kan nghah chhungin test-na khawl indaih lo, result chhuak har lutuk vanga mangang thâwmin min nang ta hi a pawi tak zet a ni," an ti.

MPCC tarlan danin, Nagaland chuan a ṭulzia hriaa BSL-3 (bio safety level laboratory) an din thar chu Naga Hospital Authority, Kohima-ah May 20, 2020 khan an chief minister Neiphiu Rio chuan a hawng tawh a; Tripura pawhin BSL-3 lab siam turin tender an ko tawh a ni.