KHAWTHLIR

Salvation Army Youth, Siaha Commanding Officer bial chuan an din champha pualin September 19, Inrinni khan Siaha District Hospital blood bank-ah thisen an pe a, a petute mipa pariat an ni.

State Referral Hospital (ZMC)-a Covid-19 vei vanga enkawl mek zinga nu pakhat chuan tun hnai khan naute a hring a, a nau hrin chuan hripui a vei lo tih finfiah a ni. Naute hi zai chhuah a ni a, a nu nen nimin khan damdawi-in aṭangin chhuahtir an ni.

Khawzawl veng hrang hranga dawr leh sumdawnna hmunte chu zonal officer, police leh village task force-te’n September 16-18, chhung khan an endik a, Covid-19 chungchanga sorkar thuchhuahte an zawm leh zawm loh an enfiah. Thuneitute hian dawr neitute leh sumdawnna hmuna awmte’n anmahni dawrtute an lo chhinchhiah dan leh hmai tuamna leh hand sanitiser an hman dan te, inkar hlata an awm dante an enfiah a ni.

NSUI, Mizoram chuan, Vairengte screening point-ah Rapit Antigen Test titu tur laboratory technician an indaih loh avangin driver-te endik zung zung theih a ni lo tih an tarlang. An thuchhuahah, “Lirthei tangkhang a tam a, an inhnawh tâwt nasa. Lirthei dang kal leh veivah harsa khawpin lirthei tangkhang a tam a, ni tin mamawh, eichawp leh bungrua tam tak duh angin a rawn luh zung zung theih loh phah a ni. Vairengteah screening point siam belh vat a nih theih nan hma la turin sorkar kan ngenin kan phût a ni,” an ti.

State Referral Hospital-ah Covid-19 vei mi 70 an awm mek a, an zinga panga chu nimina dah luh an ni. SRH-ZMC Bulletin tarlan danin, hripui vei vanga SRH-a enkawl mek zingah ICU-a awm an awm tawh lo a, Isolation Ward-ah mi 69 leh SICU-ah mi pakhat an awm. Enkawl mekte hi an dinhmun a ṭha a, ngaihtuahawm an awm lo.