Olympian H Lalruatfeli Rs. 5,00,000 hlân

Rio Olympic 2016 neih zawh taka India women hockey team-a tel H Lalruatfeli (20) d/o H Lalbiakchhunga, South Lungleng chuan nimin khan Aizawl a rawn thleng. Mizoram State Olympic Association bul tumin Central YMA Hall-ah Sports & Youth Services minister Zodintluanga hoa hmuah a ni a, minister hian incentive cash award Rs. 5,00,000 a hlan.

Sports Minister chuan, H Lalruatfeli tumruhna fakin, "Lalruatfeli hian hrisel lohna vang leh harsatna tam tak vangin hockey hi a khel thei lo
ṭêp a, chumi hnua Olympic thleng theia a tumruhna leh huaisenna hi kan ṭhalai infiammite hian entawn se ka duh. Mizoram aṭangin Olympian Lalremsanga kan neih aṭanga kum 20 hnua Lalruatfeli kan nei leh hi a ropui hle a ni," a ti.

Zodintluanga chuan, Lalruatfeli chanchin aṭang ringawt pawhin infiamna lama tuite tan entawn tur tam tak a awm thu sawiin, "Hrisel lohna vangin nang chu i tel thei tawh lo, an tih hnuah vawiin hi a thleng thei a ni," a ti.

H Lalruatfeli chuan, "Olympic-a tel harzia hi ka sawi thiam lo a, chu chu ka sawi thiam dan a ni. Kumin February thlaa South Asian Games-ah khan ka khel a, a hnua ram danga inkhel zawng zawngah India first eleven ka ni vek a, Olympic atana mi 40 an thlan aṭanga mi 18 zingah ka tel ve a, mahse, last 16 chu ka ni ta lo a ni," a ti.

H Lalruatfeli sawi danin, India hockey team tura an koh mi 16 zingah tel lo mah se, Olympian a nih lohna a awm lo a, IOC President Tjhomas Bach hnen aṭangin aṭangin participation certificate pawh a dawng a ni.

Inkhawmah hian Mizo zinga Olympian hmasa ber Lalremsanga'n a thutiam, 'Mizo zinga Olympian an awm leh hmasak berah ka hlan chhawng ang' tih tihhlawhtlinna atan Olympic badge a dawn chuRuatfeli hnenah a hlan.

Mizoram State Olympic Association-in Rs. 2,00,000 leh Mizoram State Sports Council-in Rs. 3,00,000 an hlan a ni.

H Lalruatfeli hi kum 2008 khan Thenzawl SAI-ah hockey khel tura hruai a ni a, March 2010-ah Gwalior-ah hruai thlak niin, kum 2015 khan India junior camp a zawm a, a hnuah senior team-ah koh a ni.