FCI kudam sawn chhuah thuai phût

Mizoram University Joint Action Committee chuan, Tanhrila Food Corporation of India (FCI) kudam chu sawn chhuak thuai turin thuneitute an phût a; chawlhkar khat chhunga hmalakna hmuh tur a awm loh chuan na zawka hmalak an tum thu an puang.

MZU JAC-te hian nimin khan Aizawl Press Club-ah thuthar thehdarhtute kâwmin, Tanhrila FCI kudam sawn thuai tura thuneitute an phût an puang a; MZU Students Council president Vanlal-
ṭana Khiangte chuan, "Hma an lak thu sawi rengtu Mizoram sorkar hian eng chena thui nge hmalakna hi an kalpui tawh tih sawifiah ngei turin MZU JAC leh Tanhril khawtlangin kan phût a ni," a ti.

Vanlalṭana Khiangte chuan, FCI kudam chu sawn turin kum 2007 aṭanga an ngen tawh ṭhin thu te, Mizoram sorkar hotute leh FCI hotute ṭum eng emaw zat an hmuh tawh thute sawiin, "Sawifiahna pawmawm tak kan hmu lo emaw, chawlhkar khat chhunga inbiakna mumal tak a awm loh chuan FCI kudam sawn chhuah a nih ngei theihna turin nasa zawka hmalak kan tum," a ti a; an ngennaah tun thlenga an beisei ang chhanna an la dawng lo chu hriatthiam harsa an tih thu a sawi.

MZU Students Council Presi-dent chuan, "FCI kudam hi amah mai hian a hnawk kan ti lo a, kan duh lo a ni lo a; a ken tel truck-te hi a hnawk kan tih em vanga duh lo mai kan ni zawk," a ti.

FCI kudam sawn chhuak thuai tura hma an laknaah, an duh dan ang lo deuha kal a ṭul a nih pawhin, an dinhmun leh harsatnate hriatthiampuia thlawp turin mipui a ngen a ni.

MZU Non-Teaching Staff Association vice president Dr Lawmsanga chuan, FCI kudam chu sawn chhuah nghal mai theih a ni lo tih an hriat thu a sawi rualin, lirthei che vêl chungchanga harsatna an neihte chinfel kawngah erawh tih nghal theih a nih thu a sawi a, "Kan nghah reng ringawt chuan an ti dawn lo niin kan hria a, chuvangin na zawka hmalak a ṭul ta niin kan hria," a ti.

Dr Lawmsanga chuan, FCI kudam sawn chhuah chu MZU-a kal ṭhinte leh Tanhril mipuite mai bakah, veng dang mipui te, FCI leh buhfai phurtu truck-te zawng zawngin an duh vek niin a sawi bawk.

FCI kudam sawn

chhuah an duh chhante

1. Truck lian qtl. 200 chuanga rit phur ṭhinte'n kawng an rap chhe nasa a, kum 2014-a hruaitu hmasate leh zirlaite’n ni sá leh ruahsur hnuaia lungawi lohna lantir meuha an lo sual chhuah heti maia min rah chhiatsak leh hi rem kan ti lo.

2. Truck-te hi kawng sirah a thla a thla chuang an ding ṭhin a, truck 100 chuangte a din ṭhin avangin motor a ti jam nasa ṭhin hle. A huna thleng hman lo zirtirtu leh zirlai an awm phah fo a, zirna nasa takin a tichhia.

3. Ni tin lirthei 1,000 velin kawng hi zawh ziah ang kan ni a, chu'ng lirtheite tan chuan kawng sir leh kawng kual laiah truck hi park
ṭhin a nih avangin a hlauhawmin nunna hlauhthawnawmah min dah reng a ni. Accident lian a thlen hma ngeia min chinfelsak kan phût.

4. Truck-te hian bawlhhlawh paihna mumal an neih loh avangin kawng kam an tihnawkin an tiṭawp hle.