Health Minister-in MNC building a hawng

New Secretariat Complex-a Mizoram Nursing Council (MNC) building thar chu nimin khan Health minister Lal Thanzara'n a hawng. MNC building hi Rs. 64,67,748 sênga sak a ni.

Health Minister chuan, India rama nursing council changtlung berte zinga mi Mizoramin a neih thu sawiin, "Nursing council hmalakna vangin Mizoramah nurse ṭha tak tak tam tak chherchhuah an ni tawh. Nurse-te chungah damlote'n rinna an nghat a, beiseina an nei sang em em a, tute lakah pawh hlim hmél pu tur leh zaidam taka damlote enkawl tura beisei an ni. Hna hautak leh hahthlak, rim taka thawktute hi sorkarin an mamawh a pe em tihte ngaihtuah tel a ngai," a ti.

Building hawn inkhawm hi MNC president Lalbiaksangi'n a kaihruai a; Health principal director Dr K Ropari leh MNC president hmasa ber Thanpari Pautu-te pawhin thu an sawi.

Mizoram nurse-te hi kum 1991 hma lamah Assam Nursing Council hnuaiah an awm a, kum 1990-a Mizoram Nursing (Registration) Act neih a nih hnuah Mizoram Nursing Council a ding. MNC president hmasa ber chu Higher & Technical Education director ṭhin Lalawia a ni a, Registrar hmasa ber chu Health Worker Training School tutor Lalbiaksangi a ni.

Kum 1994 aṭangin MNC hnuaiah nurse/health worker (ANM) exam ṭan a ni a, nurse-te diploma certificate pek an ni. Indian Nursing Council-in kum 2000 aṭangin a pawm a, INC nen ṭha takin an inthlunzawm a ni.

MNC building hawn tâk len zawng hi a dung ft. 60 leh a vâng ft. 30 a ni a, chhawng li niin, a chung ber chu office atan hman a ni. Building sak nan a hranin sum hmuh a ni lo a, MNC sum khawl sa aṭanga sak a ni.