Hunthar Veng lei tawlh a la hlauhawm zel A venna atan kum 2015 chhungin Rs. 59,67,800 hmang

Hunthar Veng, Aizawla lei tlahniam chu ruahsur nasa avangin a hlauhawm belh zel a, zawi zawiin lei a la tawlh deuh reng. Hetihlai hian he lei chetna hmun venna atan hian kum 2015 khan sorkarin Rs. 59,67,800 a hmang.

Hunthar Veng branch YMA president Rohmingthanga chuan zawhna chhangin, lei hi nimin thleng khan a la tawlh deuh reng a, in ṭhiah belh leh chenna in chhuahsan erawh an awm belh rih lo tih a sawi. NH-54 kawngpui chhaka kawngpui kal phei chu a min bal vek tawh a, inkalpawh theih a ni tawh lo tih a sawi bawk.

Hunthar Venga lei tlahniam
ṭhin venna tur siamna atan hun eng emaw chen aṭang khan sorkarin Rs. 59,67,800 a hmang tawh a, sumte hi Disaster Manage-ment & rehabilitation (DMR) department-in kum kal ta 2015-ah a pe chhuak a ni. Tun hnaia lei tawlh vangin chhungkaw 47-in an in an chhuahsan tawh.

Hunthar Venga lei tlahniam
ṭhin venna hna thawh nan DMR department hian Architech Interior Engineer Construction (AIEC) hnenah August 26, 2015-ah Rs. 20,78,000 an pe a, October 5, 2015-ah Rs. 8,89,800 an pe leh bawk a; AIEC hnena an pek zawng zawng chu Rs. 29,67,800 a ni. PWD hnenah November 10, 2015 khan Rs. 30,00,000 an pe leh bawk.

Heti hian Hunthar Veng lei tlahniam venna atana kum 2015 chhunga DMR department-in sum an pek zawng zawng chu Rs 59,67,800 a ni a; tunah hian lei tla-hniam venna atan Rs. 8,07,150 pek chhuah leh tura ruahman mek a ni.

DMR department hotute sawi danin, Hunthar Venga lei tlahniam siam ṭhatna atan PWD leh AIEC hnenah hna chi hrang hrang thawhna atan sum an pe chhuak a; PWD leh AIEC-te chuan lei hnuai hnawh, tuihâwk luankawr siam, lei tawlh tur venna tur siam hnate an thawk
ṭhin a ni.

Hunthar Veng lei tlahniam
ṭhin hi lei chhungril tak taka a awm dan chiah hriat a harsat avangin, endik turin GSI mithiamte koh an ni a; GSI mithiam pahnih chu August 23, 2016 khan Shillong
aṭangin an lo thleng a, lei awm dan an enfiah mek zel a, September 3 thleng an endik dawn a ni.

GSI mithiamte'n an hmuh dan aṭanga report an siam hmangin DMR department chuan detailed project report (DPR) an siam leh dawn a, DPR an peih veleh NDMA Mitigation Wing-ah an thehlut leh ang. GSI mithiamte report nena DPR an siam hmangin Hunthar Veng lei tlahniam ṭhin chu a vênna ngêlnghet zawk (permanent solution) siam theih an inbeisei thu an sawi.

DMR department hotute chuan, Hunthar venga lei tlahniam
ṭhin chu lei hnuai aṭanga chhiatna thleng a nih avangin a venna leh thawm ṭhatna hna thawh tawh tam tak chu tun hnaia lei tawlh vangin a chhe leh vek tawh tih an sawi.

Project lian tham tak hmanga thawh a nih loh chuan vên a harsa dawn nia sawiin, DMR hotute chuan, "Tuna Geological Survey of India (GSI) mithiamte'n an endik zawhah National Disaster Management Authority (NDMA)-a Mitigation Wing-ah DPR lian tham tak siam tur a ni a, cheng vbc. 15 thleng pawhin Cen-tral lam chu an inhuam a ni," an ti.

Hunthar Veng Branch YMA secretary Zohmingthanga Zote pawhin DMR kaltlanga PWD leh AIEC-te hnathawh chu YMA-in an enpui fo thu sawiin, lei chêt dan chu a ril avangin cheng nuai 40/50 hmanga a tihdam hna thawh mai chi nia a lan loh thu a sawi.

Zohmingthanga Zote chuan, August 27, 2016 thleng khan tun hnaia lei tawlh vanga in chhuahsan chu chhungkaw 47 an ni tawh a, BCM biak-in pawh a hma lam zawng an ṭhiat tawh tih a sawi a; in ṭhiah hnatlang an neihah veng hrang hranga YMA leh mimal leh pawl hrang hrang
aṭanga ṭan-puina sum an dawng zel lawmawm an tih thu a sawi bawk.