KHAWTHLIR

Thisen pe

Upper Republic Branch KṬP chuan Inrinni khan blood donation campaign an huaihawt a, Synod Hospital tan mipa 26 leh hmeichhia pakhatin thisen unit 27 an pe.

Zirtirtu tha

J Lalrinmawii, Sakawrtuichhun Primary School-I a headmistress chu zirtirtu ṭha chawimawina, 'National Award for Teachers 2016' dawng tura thlan a ni a; kumina Teacher's Day, September 5-ah New Delhi-ah award hi a dawng ang.

Paper present

Candy Lalrempuii, Mission Vengthlang chuan August 25-26, 2016 chhunga Puducherry-a International Conference on Informatics and Analytical-ah paper a present a; a paper title chu, 'Sentiment classification of crisis-related tweets using segmentation' tih a ni.

Traffic zirhona

Aizawl city traffic police leh MJA chuan, vawiin chawhma dar 11:30 aṭang hian Aizawl Press Club-ah MJA member-te pualin Traffic Awareness Campaign an buatsaih dawn a; MJA member-te kal vek turin an inhriattir a ni.

Former Councillors

Aizawl Municipal Corporation (AMC)-a councillor hmasa berte chuan, August 26, 2016 khan Hotel Chief, Zarkawtah inhmukhawmin, Former Councillors of AMC tih pawl an din. An hruaitute chu - president CT Zakhuma, vice president Zarzoliana, treasurer Lalrinenga Sailo, secretary Hmingthanzami, assistant secy. Zamanthangi leh finance secy. Lalrimawia te an ni.

Pandal sa tan

UPC (Mizoram) ṭhalai pawl inkhawmpui lian ber, PYD General Conference, September 22-24, 2016 chhunga Vairengtea neihna tur pandal chu August 26, 2016 khan Vairengte Field No. 2-ah sak ṭan a ni. Pandal sak ṭannaa tel tur hian Aizawl aṭangin General PYD president Upa H Lalrintluanga leh hruaitu ṭhenkhatte an kal a; pandal hi a dung ft. 150 leh a vâng ft. 100-a zaua sak tum a ni.

Mei zu vai

Siaha District Anti Tobacco Squad chuan Inrinni khan Siaha bazar hmun hrang hrangah phal lohna hmuna mei zu an vâi a, zirlaite hnenah vaihlo tih ṭhat lohzia an zirtir bawk.

BAR hruaitu

Mizoram BAR Association (MBA) chuan tun hnai khan hruaitu thar an thlang. President-ah Nelson Sailo thlangin gen. secretary-ah C Zoramchhana bakah hruaitu dangte an thlang.

Kanpur-ah thi

Synod Mission Board hnuaia Lucknow Mission Field chhung, Kanpur-a missionary ni mek, Ramthanga Ngente leh a fapa Jerry-a te nimina inkhawm tura scooty-a an tlân lai chu truck-in a hnâwl a; a hmunah Jerry-a a thi a, Ramthanga Ngente a hliam. Ramthanga Ngente hi West Phaileng khua a ni.