CCTV thawh 3-na vuah mek; Street light tha lo vangin CCTV a tangkai tâwk lo
KSJ Dynamic Security, New Delhi chuan Aizawl khawpui chhunga closed circuit television (CCTV) vuah hna a thawh thumna an thawk mek a, kumin October thlaah zawh hman an inbeisei. Hetih lai hian, Home department-in CCTV an vuah tawhte chu zan lamah street light a awm
ṭhat loh avangin a ṭangkai tur angin a
ṭangkai tawk lo.
Home department-in Aizawla CCTV an vuahah, a thawh khatnaah hmun 10-ah camera camera 59 dah a ni. A thawh hnihna leh thawh thumnaah camera 143 dah tur niin, project pumpui atan khawpui chhung hmun hrang hrangah CCTV camera 202 dah tura ruahman a ni a; a thawh thumnaah hian hmun 18-ah camera vuah tum a ni.
Home department hotute sawi danin, CCTV vuahtu KSJ Dynamic Security-te hian tunlai hian Aizawla CCTV vuah thawh thumna an buaipui mek a; a tira DPR-a tel lo - traffic control room te, Aizawl PS, Bawngkawn PS, Vaivakawn PS leh Kulikawn PS-ahte CCTV dah tel turin hma an la a, a thawh thumnaah hian vuah tel nghal tum a ni.
Aizawla CCTV vuahte hi a vuahtu KSJ Dynamic Security-te'n kum li chhung an enkawl zui dawn a, chumi chhung chuan Mizoram police-te a enkawl dan an zirtir ang a, kum li hnuah chuan Mizoram police-te'n an enkawl tawh ang. Aizawl SP pisaah CCTV control room a awm a, sorkar chawlh leh Inrinni leh Pathianni-ah pawh châwl loin mipa paruk leh hmeichhia pangain an enkawl mek.
KSJ Dynamic Security-a thawkte chuan, CCTV enkawltute'n an vil taimak hle a ngaih thu te, tunah chuan chawpchilha thil thleng atana an hmanna aiin, thil chhui nan a ṭangkai zawk rih thu Vanglaini an hrilh.
Home department hotute chuan, India hmarchhak state zingah Mizoram chiah chu CCTV vuah puitling thei a nih thu leh state pahnihah chuan an puitlin theih loh thu an sawi.
Home department leh KSJ Dynamic Security hotute sawi danin, CCTV hi zan lamah ṭha taka hmang turin night mode-ah dah a ngai a, night mode-ah dah chuan street light ṭha tak a awm a ngai thung.
Aizawlah street light a ṭhat tâwk loh avangin lirthei êngin a chhun khalh chuan black & white-in mihring an lan bakah a fiah tâwk lo hle tih an sawi a, "Torchlight-in kan mit a chhun chuan a chhuntu hmuh a har ang deuh hi a ni," an ti.
Police-te chuan, CCTV chu zan lama pawikhawihna a awmin a chhan hriatna atan a ṭangkai tih sawiin, "Hman deuha Treasury Square-a mi pakhat hliam nasa tak tuar pawh kha mihring kutthlak nge lirthei sut tih hriat a har a, ngun taka CCTV aṭanga kan en hnuah motor sut ngei a ni tih kan hria," an ti. Chutih rualin, street light
ṭhat loh avangin lirthei tlanbo nghal chu a number an hriat theih loh thu an sawi.
Aizawla local council hrang hrangte'n an veng ṭheuha street light an neih zat AMC-a an report danin, Aizawlah hian street light 5,714 a awm a, chu'ng zinga 3,910 chu a êng ṭha mek a, 1,796 erawh chu a ṭha lo thung.
Police hotute chuan CCTV thlalak chungchanga mipuite hriat tur sawiin, "Mi ṭhenkhat chu an dawrah thil bo a awmin an lo kal a, thlalak a awm beiseiin rawn lak mai theih emaw an ti a, hei hi a dik lo. CCTV-in a lak theih chinah chuan thlalak an en duh chuan FIR an thehlut phawt ang a, case IO-in a chhui ang a, CCTV-a thlalak bik chu Aizawl SP phalnain an la chhuak ang a, Court-ah pawh hman zel theih a ni ang," an ti.
Aizawla CCTV vuahna hna hi Aizawl City Surveilance Project aṭangin thawh a ni a; sum ruahman cheng nuai 1,265 chu Ministry of Home Affairs-in March 30, 2013-ah a rawn pe tla tawh. Modernisation of State Police Force Scheme (MPF Scheme) hnuaiah Union Home Minister Discretionary Fund
aṭanga dawn a ni a, he project-ah hian state sorkarin sum tum ve tur a nei lo a, MHA-in a rawn tum vek a ni.