Taxi pawl pahnih an infin

Mizorama taxi neitu leh enkawltu pawl pahnih - Zoram Taxi Owners’ Association (ZTOA) leh Zoram Taxi Drivers’ Association (ZTDA)-te chu pawl pakhatah an inchhûng khawm a, an pawl hmingah Mizoram Taxi Association (MTA) tih an vuah.

MTA thuchhuah chuan, ZTOA leh ZTDA-te inchhûn khawmna pawl thar MTA chu taxi neitu leh khalhtute intél khawmna pawl a ni tih sawiin, "Tun hmaa ZTOA leh ZTDA ni ṭhinte kha MTA tih kan ni tawh a ni tih mipuite kan hriattir a ni," a ti.

MTA chuan, sorkarin an harsatna hrang hrang a ngaihtuahsak a, a tih-hlawhtlinsak avangin lawmthu an sawi a; "Kan duhthusam ang ni rih lo mah se, min ngaihtuah chhun-zawmsaka min tihhlawhtlinsak ngei kan beisei," tiin, sorkar rua-hmannate chu dodal mai lo a, thuawih taka zâwm phawt turin taxi neitu leh khalhtute an chah.