Lunglei Zohnuaiah invit hlum

August 27, 2016 zan dar 10 pelh hretah khan Stephen Lalchawiliana (26) s/o H Remlalliana, Lawngtlai chuan C Lalsawmliana (33) s/o C Lalrinawma, Lunglei Zohnuai a vit hlum a; Stephen Lalchawiliana hi police-te'n an man nghalin, Lunglei District Jail-ah an dah.

Lunglei police-te hnen
aṭanga thu dawn danin, Inrinni zan dar 10 pelh hret khan Lunglei Zohnuaiah Stephen Lalchawiliana leh tlangval dang pakhat, Muana tia kohte an intibuai a; intibuaite chu C Lalsawmliana chuan a ṭhelh a ni. Muana chu a kal sawn mai a, Stephen-a pawhin haw tur anga insawia a kal pahin chemtein C Lalsawmliana chu a dulah a vit ta mai niin an sawi.

C Lalsawmliana hi Christian Hospital panpui nghal a ni a, mahse, chhan hman a ni lo. Nimin khan a taksa endik a nih hnuah vui a ni.

He thil thleng avang hian nimin chhun khan Zohnuai
ṭhalai eng emaw zat chu Stephen Lalchawiliana hmuh tumin Lunglei Police Station kawtah an pungkhawm a; Police hotute'n Stephen Lalchawiliana chu District Jail-ah dah a nih tawh thu an hrilhfiah hnuah an ṭîn a ni.

Zohnuai ṭhalaite chuan, pawi khawihtu chu dan anga a na thei ang bera hrem an phût thu te, Stephen Lalchawiliana chu Zohnuai rap tawh loh tura an duh thute an tarlang. Stephen Lalchawiliana hi Lawngtlai khua, Zohnuaia a pute ina awm ṭhin a ni.