Governor-in PM leh HM a kawm Mizorama AIIMS din dilna a thlen
Sorkar laipui dawra New Delhi-a cham mek Governor PS Sreedharan Pillai chuan tun hnai khan prime minister Narendra Modi leh Home minister Amit Shah-te an chenna inah a kawm a, PM hnenah hian Mizorama All India Institute of Medical Sciences(AIIMS) din sak tura dilna a thlen.
PS Sreedharan hian Narendra Modi nen an inkawmnaah Mizoram chhungah health sector chungchang ngaih pawimawh bik a ṭul thu sawiin, Mizoram chhunga HIV/AIDS, cancer, malaria, heart attacks lam kaihhnawih leh thildang avanga harsatna tawh ṭhinte a hrilhfiah a, "Sum tam tak sengin damlo tam takin phai lam an pan ṭhin a, mimal leh sorkar sum tam tak senral ṭhin a ni," a ti.
Governor chuan damlohna avanga phai panna senso mimal leh sorkarin sum tak tak an sen ṭhin tihtawp a nih theihna atan AIIMS emaw a tlukpui Mizoramah din a ṭul thu sawiin, chutiang chu din ngei turin Prime Minister hi a ngen a ni.
Health sector chungchang bakah Governor leh Prime Minister hian Mizoram tana thil pawimawh chi hrang hrang an sawi dun a ni. Governor hian Union Home Minister chu December 18 tlai khan kawmin, Mizoram mamawh chi hrang hrangte a thlen a, tihhlawhtlin sak ngei turin a ngen nghal.