Synod Hospital-a damlote leiba nuai 354 chuang
Synod Hospital, Durtlanga damlo awm, awm man pe thei lo mi 965 te leiba tling khawm Rs 35,474,496 a awm mek. Hei hi December 9, 2020 thlenga thawktuten an chhinchhiah dan a ni.
Synod Hospital hotute chuan damlo awm man pe thei lo zingah biak zui ngaihna hriat loh awm ṭhin mah se, a tam ber chu mi harsa tak tak an nih thu sawiin, "Mi retheite kan zakzeh avangin malsawmna kan dawng thung. Mimal damdawi-inte ang loa, milian leh mite sawi loa dawngsawngtu kan nih avangin mi nawlpui tan an luh dawnah dahkham kan ti ve ngai lo," an ti. Hetihlai hian K Ward a awm tur leh ICU a awm turte tan erawh dahkham an siam ve thung.
Damdawi-ina awm man bill pek tur nei lote zingah mi harsa zual tak tak chu Charity Fund Cell hmangin, Director, Medical Superintendent leh Co-ordinator ten Rs 20,000 thleng an rulhsak thei tih sawiin Synod Hospital hotute chuan, "Awm man rulhsak ngaite hi an lawina kohhrante hriatpuina emaw an awmna ward lama thuneituten an ziahsak a ngai thung," an ti a, dinhmun harsa si, awm rei bawk si, nuai 3 chuang awm man pek ngaite pawh an awm ṭhin thu an sawi.
Synod Hospital hotute sawi danin, awm man pe thei lote chu lehkha, phone call leh a châng chuan an chenna ina kal ṭhin changte an nei a, tunhnaiah chuan whatsapp leh phone call hmanga ṭhin an ni.
An kohhran secretary hnenah lehkhate thawn ṭhin niin, kohhran lian deuhte chuan an rulhsak mai ṭhin a, kohhran tê deuh tan rulhsak a harsa thung. Chhuah dawna phone number an pêka biak tlang ngaihna awm leh si lo te, kohhran hruaituten an kohhran mi an nih loh thu an lo hrilh leh site a awm ṭhin thung. Harsa tak tak karah sual ve hrim hrim an awm leh zauh ṭhin. Mi tam tak chuan an awm man batte installment a rulte pawh an awm ṭhin.
Synod Hospital a thawktute chuan charity fund chu an hmang ṭangkai hle niin an sawi a, "Kum 2017-2018-ah hian charity fund aṭangin damlo, awm man pe thei lo mi 295 pêksakin, a vaiin Rs 53,57,310 kan hmang. Kum 2018 - 2019 ah hian damlo, awm man pe thei lo mi 403 hnenah Rs. 61,86,921 an pe chhuak a, kum 2019 - 2020-ah damlo mi 665 hnenah pe chhuakin, Rs 11,045,172 sen a ni," an ti.
Synod Hospital sum hmuh dan :
Kum Charity Fund Hospital Sunday Total
2017-2018 Rs 35,82,724 Rs 22,42,810 Rs 58,25,536
2018-2019 Rs 36,98,263 Rs 2497658 Rs 61,95,921
2019-2020 Rs 89,46,824 Rs 32,60,935 Rs 1,22,07,759