LESDE Minister-in Mizoram lam hawi turin sumdawngte a sáwm

Labour, Employment, Skill Development & Entrepreneurship (LESDE) minister Lal-nghinglova Hmar chu February 5, Nilaini tlai khan Chennai-a North East Investors Summit-ah telin thu a sawi a; Mizoram chu investor-te tana hmun ṭha a nih avangin Mizoram tlawh tur leh Mizoram lam hawi turin sumdawngte a sáwm.

Ministry of Deve-lopment of North Eastern Region (DoNER) buatsaih NE Investors Summit-ah hian Lalnghinglova Hmar chuan, Mizoramin tun hnaiah thlai a thar ṭha a, a bikin sorkarin lei a intiam - sawhthing, hmarcha, aieng leh hmunphiahte lei tur a tam dawn tih a sawi a, "A hlawma lei duhte tan Mizoram sorkarin kawng a hawng zau zel dawn a ni," a ti.

Mizorama sawhthing chi hnih - thíngpui leh thíng­laidum leh Mizo hmar­cha ten geographical indication (GI) tag an neih tawh thu sawiin Lal­nghinglova chuan, "Hmun danga hralh chhuah tlak an ni," a ti a; a hralhna kawngah leh a sawngbawlna tur din kawnga thawhpuiah sum­dawng liante a sáwm.

LESDE Minister chuan, Mizoramah mau a ṭha duh hle tih sawiin, ṭangkai lehzuala mau sâwngbàwl a nih theih nan thawhpuiah industry neitute a sáwm. DoNER minister Jyotiraditya Scindia pawhin India hmarchhak chu mau tamna leh ṭhat duhna a nih avangin a hmun ngeiah kal a, zir chiang a, hmang ṭangkai turin industry neitute a chah a ni.

Lalnghinglova Hmar chuan, Mizo ṭhalaite state páwnah hna thawka an chhuah nasat thu sawiin, "A bikin hospitality service lamah hnuhma Mizo ṭhalaite'n an nei ṭha a, hemi lamah hian lian thama kalpui turin investor ṭha kan mamawh," a ti.

Sports minister ni bawk Lalnghinglova chuan, India hmarchhak chu infiamnaah theihna nei sang tak nei a nih thu te, India-in Olympics 2036 thlen a tumnaah tun aṭangin hmarchhak state-te'n infiammite an buatsaih ṭan thute a sawi a; infiamna lamah pawh DoNER ministry leh sumdawngte chu thawhpuiah a sáwm a ni.

NE Investors Summit-ah hian hmarchhak state hrang hrang aiawhte'n theihna an neihte tarlangin, an state-ah sumdawnna huang zauh turin sumdawngte an sáwm a; Mizoram sorkar aiawhin Agriculture leh Horticulture department enkawltu secretary Ramdinliani'n Mizoramin theihna a neihte a sawifiah.

Investors Summit-ah hian Commerce & Industries director Maria CT Zuali leh sorkar official dangte pawh an tel a ni.