Kolasib leh Cachar DC-te an inkâwm

Kolasib bawrhsap Robert C Lalhmangaiha leh Cachar bawrhsap Mindal Yadav te chu nimin khan Cachar DC conference hall-ah an inkâwm a; ramri hnaiha chengte'n harsatna an tawh loh nan minister level joint resolution vawng chungin a ṭul anga thawh dun an rêl.

DC pahnih inkawmnaah hian thawhho dan tur leh inhriatthiam tawnna ṭha zawk neih theihna tura pawimawhte an sawi dun a; state pahnih ramri hnaiha chengte'n harsatna an tawh loh nan leh thlamuang taka an awm theih nan minister level-a inbiaknaa joint resolution siam tawh chu vawng zel chungin a ṭul anga thawh dun zel ni se, an ti.

Mizoram chhunga national highway thlûr lia siam tur chungchang pawh sawi lan a ni a; hun remchang hmasaah Kolasib-ah inkawm leh turin thu an dah bawk.

Robert C Lalhmangaiha chuan, Mizoramin VC/LC inthlanpui a hmachhawn turah ramri leh a chhehvela dan leh thupek kenkawhna lamah a ṭul anga thawhpui turin Cachar DC chu a ngen a; inunauna ṭha zawk a awm theih nan Kolasib-ah Chapchar Kût hmanpui turin a sáwm.

Bawrhsap ṭawiawmtu Kolasib SP David H Lalthangliana chuan, Cachar SP N Mahato leh a hote'n Mizoram police-te kawng hrang hranga an thawhpuinaah an lawm thu a sawi a; hun kal zel turah pawh thawhpui zel turin a sáwm a ni.

Inkawmhona hi August 9, 2024-a MIzoram leh Assam Home Minister-te'n ramriah inpawhna leh thawhhona ṭha zawk a awm theih nana DC leh SP level inbiakna neih ṭhin an rêl anga buatsaih a ni. DC leh SP-te bakah hian Cachar district aṭangin DFO Vijay Palve leh official eng emaw zat an tel a, Kolasib district aṭangin IPRO David Lalhmingchhuana leh Silchar Mizoram House deputy resident commissioner Lalhmingliana te an tel.