KHAWTHLIR

Pastor & missionary mante chhuahtir

Rev. Lalzedanga leh evangelist Vanlalhuma Zadeng, January 5, 2025-a police-in an mante chu February 5, Nilaini khan jail aṭangin bail-in chhuahtir an ni. Lucknow Mission Field-a field secretary Rev. Dailamthanga chuan Mizo pahnihte hi an hriselna a ṭha tih a tarlang. Raebareli bialtu pastor Rev. Lalzedanga leh Vanlalhuma Zadeng te hi January 5, 2025 khan Ajmatulaganj khuaa Lalpa Zanriah Sakramen buatsaih an tum laiin police-in an man a ni.

Science zirho

Pachhunga University College-a Life Science department pathum chuan nimin khan PUC Seminar Hall-ah 'Advances in Biological Sciences' tih thupui zirhona an buatsaih a; Prof. H Lalruatsanga’n kaihruaiin, Dr Van­ramliana’n thu a sawi. HHU ambassador Prof. Kishore CS Panigarahi, NISER, Bubhaneshwar leh MZU Zoology department Prof. HT Lalremsanga te paper zirho a ni a; Sweden, USA leh India rama zirna-in hrang hranga researcher-te'n paper an present bawk.

Sarâng khapna kalpui dan tur rêl

Champhai District Inspection Team on Single Use Plastic chuan chairman VL Remliana, bawrhsap hoin nimin khan hman khat daih sarâng khapna kalpui dan tur an rêl a; DC hmingin hman khat daih sarâng khapna thupek chhuah a, VC leh dawrkai tinah pek ni se, an ti. BDO-te kaihhruaiin gram babha-ah hman khat daih sarâng ṭhat lohna inzirtir leh hman khat daih sarâng man hmain zau zawka inzirtirna kalpui tum a ni.

Ramkalte hming ziak tura ngen rêl

Serchhip District Level Committee on Fire Prevention chuan nimin khan an chairman Paul L Khuma, bawrhsap hoin February 10-15, 2025 chhunga Fire Prevention Week 2025 hman dan tur an rêl a; ramkal apiangte hming ziak tura ngen an rêl. Serchhip district-a kângmei chhuah tamna ramte zir chian ni se, a huam chhung VC-te hnenah ngenna siam a, vil uluk lehzual tura hriattir ni se, an ti. District chhunga kângmei vennaa hma la ṭha khuate hnenah lawmman siam a ni leh dawn a ni.