Jan - Nov, 2020 chhungin AMC-in In sak ṭhiahtir - 17; chawlhtir - 64
Aizawl Municipal Corporation (AMC) chuan kumin January-November thla chhungin Aizawla mimal in, sorkar in leh zirna in sak 17 an ṭhiahtir tawh a, in sak lai chawlhtir 64 an nei tawh bawk.
AMC commissioner K Laldingliana chuan, Aizawla local council-te chu dan ang ni loa in sate lakah stay order pek theihna thuneihna an pek thu leh LC-te nen an thawhhona a ṭhat thu a sawi a, "Local council-te hi veng tina lo enfiah turin an ṭangkai hle a, keini AMC-a thawkte tan hriat vek sèn a ni lo. A dik lo chu thui an sak hmain an lo stay thuai zel a, an ṭangkai hle a ni,” a ti.
K Laldingliana chuan, AMC-a inziak lut enginer leh architech-te tel loin AMC huam chhungah in sak phal a ni lo tih sawiin, "Vantlang in, sorkar in, biak-in leh mimal inah pawh an tel vek a ngai. In sakna hmun ṭhenkhat chu a him leh him loh Geology & Mining department lamin an enfiah ṭhin a, no objection certificate (NOC) an pek loh chuan sak theih a ni lo," a ti a; in sak lai, dan ang ni loa sak nia an hriatte chu a hmunah an enfiah ṭhin a, ti ṭha tura an hriattir ṭhin thute a sawi.
AMC Commissioner chuan, mipuiin dan an ngai pawimawh tulh tulha an hriat thu sawiin, "Mipuiin dan kan pawisa tulh tulh a, mimal in, stay order kan pek hnuah thu an awih zui zel a, an ti lui lutuk lo," a ti.
AMC-a architech pakhat chuan an hmalak dan sawiin, "In sak lai tichhiaa siamṭha tura kan tihte chu lehkha kan pe a, an tichhe lo a nih chuan AMC hmalaknaa tihchhiat tur a ni a, a tihchhiatna man pawh anmahni chàwi tur a ni," a ti a; chutih rualin, in sak lai tichhe tura an tihte chuan thu an awih thu a sawi bawk.
AMC stay & demolish order dinhmun
(January-November, 2020)
No. In neitu Chawlhtir Ṭhiahtir
1. Private building 63 15
2. Commercial/institution - 1
3. Sorkar building 1 1