DIG (NR)-in Mamit a tlawh

Police DIG (Northern Range) C Lalthanmawia chuan nimin khan Mamit SP office a tlawh a; chanchinbumite kâwmin, rûkrûk vanga phone bo hmuh lêtte a neitute hnena hlanna hun a hmanpui.

C Lalthanmawia chuan, police hna chu a pawimawh a, dan kengkawhtu an nih angin entawn tlaka an thawh a ṭul thu a sawi a, "Kan hnathawhna hmun hi kan rawngbawlna pulpit a ni a, rintlak leh theihtawp chhuaha kan thawh hi kan tih tur niin, hmasawnna lam kawng zawha thawh a ṭul," a ti a; mipui vantlang, tlawmngai pawl leh chanchinbumite nen thawhhona ṭha neih a pawimawh thu a sawi.

Mamit MJA-te chuan DIG hnenah hian Mamit district harsatna leh police hnen aṭanga district ralmuan zelna tura ṭul nia an hriatte an thlen a; mamit SP Pukhraj Gupta pawhin Mamit police hnathawh tawhte a tarlang.

He hunah hian phone bo police-in an hmuh lêtsak mi pariat hnenah phone pek let a ni a; phone bote hmuh let a nih theihna tura hma latu CEIR team hnenah chawimawina hlan a ni bawk.