Lungleiah Youth Exchange Progamme

Nehru Yuva Kendra Sangathan (NYKS) hnuaia Mizoram leh Meghalaya state ṭhalaite intlawh tawnna, Inter-state Youth Exchange Progamme (YEP) chu nimin khan Lunglei Zotlanga Tourist Lodge conference hall-ah hman a ni a, Police DIG (Southern Range) Altaf Ahmad Khan-in a hawng.

YEP-ah hian Meghalaya aṭangin ṭhalai 25 an tel a, NYK Lunglei chu a thlengtu niin, February 10, 2025 thleng hun hman a ni ang. YEP chhungin Meghalaya aṭanga lo kalte chu Mizoram leh Mizote chanchin, nunphung, hnam ziarâng leh thil pawimawh hrang hrang zirpui an nih dawn a, Lunglei leh a chhehvela pisa leh hmun pawimawhte fanpui an ni ang. Mizo inmikhual dan leh Mizo ei leh inte an hriatthiam theih nan YMA, Zotlang Branch-in lo mikhualin hun an hmanpui dawn a; Mizo ṭawng, hla leh lâm zirhonate buatsaih a ni dawn bawk.

February 17-21, 2025 chhungin Mizoram ṭhalai thlan chhuahte'n Meghalaya an tlawh ve thung dawn a ni.

Altaf Ahmad Khan chuan, ṭhalaite chu ram hmasawnna kawnga a lailum luahtu leh hmanraw pawimawh ber an nih thu a sawi a; ruihhlo laka inthiar fihlim tur leh mi dangte ṭanpuitu leh zirtirtu ni zel turin ṭhalaite a fuih.

YEP hawnna inkhawm hi NYK Mizoram director Mercy Sellate-in a kaihruai a; Lunglei IPRO C Lalhruaitluanga, Lunglei YMA Sub-Hqrs treasurer K Vanlalhruaia, Meghalaya team leader pahnih - Wanteiborlang Khonglah leh Kerdalin Mylliemngap ten thu an sawi.