Vice President-in 'Oh Mizoram' a tlangzarh

Governor PS Sreedharan Pillai lehkhabu ziah 'Oh Mizoram' tih chu president M Venkaiah Naidu-in video conferencing kaltlangin  Hyderabad aṭangin a tlangzarh.

M Venkaiah Naidu chuan Mizoram chu hmun mawi tak, a chhunga chengte pawh hrisel ṭha, hawihhawm, remna leh muanna ngaina leh rimawi lama sang tak an nih thu sawiin, "Mizo hnam lam hrang hrangte hmuh nawm ka ti ṭhin. Chhiarpui hnuhnung ber 2011 aṭanga a lan dan chuan Mizoram chu hmeichhe naupiang tam lamah an entawn tlak hle. Hei hian Mizoram khawtlang nun a hrisel hle a, hmeichhiate an en hrang lo tih a lang a, a lawmawmin midangte tana thil entawn tlak a ni," a ti. 

Lehkhabu tlangzarhnaah hian chief minister Zoramthanga pawhin thu sawiin, "Governor Pillai hi ka lo hriat ṭhin dan chuan politics leh dan lama mi hlawhtling leh khawtlang tana thawh hlawk tak a ni," a ti a, hlaphuah leh thuziah lamah a lo them thiam leh zel tihlam hi a tirin a hriat loh thu a sawi. Oh Mizoram hi PS Sreedharan Pillai-in lehkhabu 125 a ziahna a ni a, Covid-19 avanga inkharkhip chhunga lehkhabu 18 a ziah zinga mi a ni.