Thangliana sûlhnu zirhona buatsaih

Pachhunga University College-a Mizo depart-ment chuan nimin khan PUC-ah ‘Thangliana kutchhuak leh sûlhnu zir chianna' (National Seminar on Thomas Herbert Lewin’s Legacy and Contributions to Mizo Literature) an buatsaih a, vawiinah chhunzawm a ni ang.

Seminar hi PUC assistant professor Enid H Lalrammuani'n a kaihruai a, principal Prof. H Lalthanzara, Mizo department HoD Dr H Laldinmawia leh Dr Lalrammuana Sailo ten thu an sawi a; Mizoram chhung leh pawna mithiam 30-in paper an buatsaihte an sawi a ni.

Zirhonaa khuallian H Lalengmawia, Higher & Technical Education secretary chuan, Thangliana (Thomas Herbert Lewin) chanchin leh a hnathawh chu zir tham a nih thu a sawi a, "Mizo hnam kha a hmangaih tak tak nge, diplomacy a thiam vang tih te, Mizo nula Dari nupuia a neih pawh Mizo a hmangaih vang nge, Mizo society-a tlâktlum a duh vang tihte pawh zir chian tham a ni," a ti.

Thangliana hi Mizo hawrawpa thuziak hmasa ber, ziaka Mizo chanchin dah hmasa leh sap ṭawnga Mizo thawnthu dah hmasa ber nia hriat a ni a; Vailen vawi khatna (The Lushai Expedition 1871-1872)-a Zoluti (Mary Winchester) la lettu, kum 1872-a Mizo lal pasarih leh an ṭhuihruai mi 27-te Kolkata-a zinpuitu a ni.