Aizawl district-ah motor 1,14,048 a awm Kuminah lirthei chesualah mi 29 thi tawh
Aizawl traffic police hotute chuan, Aizawl district-ah lirthei 1,14,048 a awm tih an sawi a; kumin 2016 chhungin lirtheia chetsualna ṭum 26 thlengah mi 29 an thi tawh tih an sawi bawk.
Traffic SP office leh MJA ṭangkawp chuan nimin khan Aizawl Press Club-ah thuthar theh-darhtute pualin, Aizawl traffic buaipui dan zirna an buatsaih a; Traffic SP C Lalthanmawia'n kaih-hruaiin, khuallian LT Hrang-chal, DIG (Northern Range) leh MJA president Vanlal-rema Vantawl ten thu an sawi.
LT Hrangchal chuan, lirthei khalhtute chauh ni loin, a chhunga chuangte leh kea kalte pawhin traffic rules an hriat ve a ngai tih sawiin, "Traffic management-ah hian traffic police-te'n mawhphur zual mah se, kawngpuia kal, tlân che vêl zawng zawngte'n mawhphurhna kan nei a ni," a ti.
DIG (NR) chuan, "Traffic management-in a tum pawimawh ber chu mihring nunna venhim a ni a, a dawtah chuan mipuite'n an tum ram tluang taka kan thlen theih nan a ni," tiin, chumi atan chuan Mizorama traffic police-te inpekna a sang thu leh anni aia inpe thûk zawk India ramah a hmuh loh thu a sawi. Chutih rualin, traffic police zingah an thawh-puite tihmingchhe zawnga khawsa an awm ve thu leh hmasawn zelna tur an neih thu a sawi bawk.
MJA president Vanlal-rema Vantawl chuan, tunlaia traffic police-te chu an ṭha tlangpui tawha a hriat thu sawiin, "Pressure a tam em em chungin an zaidam tlangpui. Uniform ha chunga ruih erawh a mawi lo a, chutiang an awm leh zauh ṭhin erawh a pawi," a ti a; traffic police-te thawhrimna an hriatpui thu a sawi.
Traffic SP C Lalthan-mawia chuan, kuminah high school leh higher secondary school 10-ah traffic awareness cam-paign an neih tawh thu leh college-ah pawh neih zel an tum thu a sawi a; zawhna chhangin, bike proton vuah kuminah 70 chuang an man tawh a, kum 2015 chhungin 140 chuang an man thu a sawi a ni.
Traffic OC H Lal-
ṭan-puia'n a tarlan danin, kumin July thla tawp thleng khan Aizawl district-ah lirthei 1,14,048 a awm a, chungte chu mimal lirthei 1,06,793 leh sorkar lirthei 7,255 a ni. Two wheeler tam berin, 71,373 a awm a, chu chu lirthei zawng zawng aṭangin 62.56% a tling.
Traffic OC chuan, rûi chunga motor khalh phal loh a nih thu leh rûi chunga khalh mante chu kum hnih thleng tàn, Rs. 3,000 chawi leh licence hlihsak thlenga hrem theih a nih thu te; mobile phone hmang chunga lirthei khalh phal a nih loh thu te; lirthei khalh laiin meizûk phal a nih loh thu te; kea kalna (footpath)-ah lirthei hun (park) phal a nih loh thute leh khawpui chhungah darkar khata km. 36 (mél 20) aia chaka khalh phal a nih loh thute a tarlang.
Mizorama lirtheia chetsualna
(Police chhinchhiah dan)
Kum Chetsual zat Thi zat
2011 63 82
2012 69 77
2013 77 97
2014 88 103
2015 50 72
2016 26 29