KHAWTHLIR

Assembly Session

Mizoram Assembly Session chu vawiin chawhma dar 10:30-ah ṭan a ni dawn a, ni hnih a awh ang. Session-ah hian Parliament-in Goods & Services Tax (GST) dan thar hman a nih theihna tura ram danpui siam ṭhat ṭum 122-na bill a lo pass tawh, Mizoram Assembly-in a pawmpuina tur ngaihtuah a ni ang. Transport department-in road tax lak dan a siam ṭhatna tura sorkarin ordinance a lo siam tawh chu House-ah pharh a ni dawn a; hemi hnu hian ordinance zûlzuiin bill put luha pass tum a ni ang.

Education Campaign

Nimin khan Kolasib High School-ah Education Campaign neih a ni a; khuallian, Kolasib DC H Lalengmawia chuan, zirtirtute chu naupangte hnena mahni inrintâwkna tuh tur leh zirlaibu chhung chauh ni lo thil ṭha zirtir tel ṭhin tur a chah. Kolasib district-ah zirnain hma a sawn theih nan sikul hrang hrangah Education Campaign neih ṭhin a ni.

I-Day thlirlet

Nimin khan Champhai DC Vanlalngaihsaka hoin Champhaia sorkar pisa hotute'n kumina Independence Day hman dan an thlirlet a; programme duhthusam lo nia an hriatte sawi langin, a sutkian dan turte an sawiho nghal a ni.

Khik chhunzawm

Aizawl Hunthar Venga lei tlak hniam ṭhinna bula lei khi chu a khik chhunzawm zel a, lei pawh a tlak belh zel. Hetihlai hian in ṭhiah ngai leh in chhuahsan an awm belh lo.

Lusún khawhar

Mizoram Journalist Association vice president hmasa ber C Chhunbura (92), Mission Vengthlang chu August 28, 2016 zan dar 11:30 khan lungphu châwlin a thi a, nimin khan vui a ni. C Chhunbura hian Zoram Thupuan tih chanchinbu a enkawl ṭhin a, kum 1972-1974 chhung MJA vice president a ni. Mission Vengthlang Presbyterian Kohhran dintute zinga mi a nih bakah, khawtlang huap pawl hrang hranga a bul tumtute zinga mi a ni bawk.