Hortoki JAC-te'n kawng dan an titawp Company-te'n kawng an siam nghal

Kawng chhiat vanga Hortoki Joint Action Committee-te'n Kawnpui leh Hortoki inkar kawng ni thum chhung an dan chu August 28, 2016 zan aṭang khan hawn a ni. Kolasib DC ngenna angin, nimin aṭang khan company-te'n kawng thawm ṭhat hna an thawk ṭan nghal.

Kawng danna hmunah hian Kolasib DC H Lalengmawia chu Pathianni khan kalin, Hortoki JAC-te thil awm dan a sawipui. Hortoki khaw mipuite tawrh-na chu a hriatthiampui thu leh, Prime Minister Office aṭangin Bairabi leh Sairang inkar rél kalna tur kawng siam mek chu chawlhkar tin deuh thaw an hmalakna thlir ṭhin a nih thu a sawi a, "Harsatna siam a nih vanga hna thawktute'n an tàwpsan chuan Mizoram tana thil pawi tak a ni ang," a ti.

Hortoki JAC hruaitute chuan, an beisei ang leh an duh dante an sawi a; Kolasib DC-in kawng siam hna thawk ṭan nghal tura a hriattir avangin kawng dan chu an tihtawp nghal a ni.

Kawng chhe lai thawm ṭha tur hian rel kawng tur siamnaa kawng ringtu company hrang hrangte hriattir an ni. Kawnpui aṭanga Zawngeklui thlang lung quarry awmna thleng NC Das company-in an thawm ṭha ang a, quarry aṭanga Kutbul lui péng (Rev. Williams Williams Road) thleng Madhava Hytech. Infra.-in an thawk ang.

Rev. William Williams Road péng leh Coastal Constructions company camp péng inkar chu North East Frontiers Railways-in an thawk ṭha dawn a; Coastal camp péng leh Lung-artui inkar chu Coastal Constructions-in an thawm ṭha thung dawn a ni.

Kawng chhia siamna atan hian NEF Railways chuan JCB pakhat an chah mek a, a dang pakhat dah belh tura tih an ni. Coastal Constructions-in excavator pakhat an hman mek bakah, NC Das company chu khawl pakhat dah ve tura tih an ni a; company hrang hrangte chu labour 20 aia tlem lo ni tin kawng thawm ṭha tura dah tura tih an ni bawk.