MZU-ah CMDAYS-2016 ṭan a ni

Nimin khan Mizoram University-ah MZU-a Department of Physics huai-hawtin National Conference: Condensed Matter Days 2016 (CMDAYS-2016)
ṭan a ni a, MZU vice chancellor Prof. R Lalthantluanga'n a hawng.

Prof. R Lalthantluanga chuan, MZU-a School of Physical Sciences hnuaiah Master of Computer Administration (MCA) leh Master of Science (Elec-tronics) zirna hawn a nih thuai tur thu a sawi a; MZU Guest House-ah conference hall thar, mi 100-150 len theihna tur siam turin ruahmanna siam mek a nih thu a sawi bawk.

CMDAYS-2016 hi India rama condensed matter physics lama scientist te, university hnuaia faculty-te leh research sholar-te intawhkhawmna a ni a; mahni research ṭheuha an thil hmuhchhuahte inhrilh tawnna atan hman ṭhin a nih bakah, India rama university hrang hrangah conference huaihawt theihna tur bik thlan a ni
ṭhin. Conference hi vawiin leh naktukah chhunzawm a ni ang.

Conference-ah hian India rama research centre lian leh hlun berte zinga mi, Tata Institute of Fundamental Research (TIFR), Mumbai aṭangin Nano technology-a scientist Prof. Pushan Ayyub chu plenary speaker a ni a, a lecture topic chu 'Nano technology in Nature: Rose petals and lotus leaves' tih a ni.

CMDAYS president Prof. SM Bhattacharjee, CMDAYS-2016 convener Prof. RK Thapa leh mithiam dangte'n thu an sawi bawk a; ram páwn aṭangin mithiam eng emaw zatin an hmanpui a ni.