COVID-19: Mizoram dinhmun Ni 2 chhungin hripui vei mi 28
December 18-19, 2020 chhung khan Mizoramah Covid-19 vei mi 28 hmuh chhuah a ni a, December 18-ah mi 16 leh December 19-ah mi 12 hmuh a ni. Inrinni leh nimin khan hripui laka fihlim tawh mi 20 chhuahtir an ni thung.
Covid-19 vei December 18, Zirtawpnia hmuh chhuahte chu mipa pakua leh hmeichhia pasarih an ni a; ZMC laboratory-ah mi pathum, TrueNAT-PCR hmangin mi pathum leh Rapid Antigen Test (RAT) hmangin mi 10 hmuh a ni.
December 19-a hripui vei hmuh chhuahte chu mipa 11 leh hmeichhia pakhat an ni a; ZMC-ah mi pakhat, TrueNAT-PCR hmangin 10 leh RAT hmangin mi pakhat hmuh chhuah a ni. An zingah Mizoram chhunga hri kái an awm lo.
Inrinni leh nimin khan Covid-19 laka fihlîm tawh mi 20 chu enkawlna hmun aṭangin chhuahtir an ni a; Inrinni khan mi 14 leh nimin khan mi paruk an chhuak a ni. Mizoramah swab sample 1,71,122 endik tawh aṭangin Covid-19 positive mi 4,122 (2.41%) hmuh chhuah a ni tawh a, mipa 3,032 leh hmeichhia 1,090 an ni. Nimin tlai dar 5 thleng khan mi 3,963 (96.14%) chhuahtir an ni tawh a, mi pasarih (0.17%) thi tawhin, enkawl mek mi 152 (3.69%) an awm.
Mizorama Covid-19 positive hmuh chhuah tawh mi 4,122 zinga mi 1,953 chu Mizoram chhunga kái an ni a, mi 2,169 chu state páwn aṭanga rawn lût an ni. December 18-ah swab sample 1,093 endik a ni a, Covid-19 vei mi 16 hmuh chhuah niin, endik zat aṭangin 0.82% a ni. ZMC laboratory-ah Aizawla mi 319, TrueNAT-PCR hmangin district pariatah mi 188 leh RAT hmangin district 10-ah mi 586 endik a ni.
Hri vei hmuh mi 16 zingah natna (Covid-19 symptom) lang chhuak mi pathum leh Mizoram chhunga kái 10 an awm a; tualchhunga kái zinga mi pakua chu hri an kài ṭanna hriat theih a ni lo. Sorkar thuchhuah tarlan danin, ZMC-a hmuh leh TrueNAT-PCR hmanga hmuh chhuah mi pathum ve ve chu tun hnaia state pawn aṭanga rawn lut vek an ni a; symptom nei lo vek an ni. RAT hmanga hmuh chhuah mi 10-te chu mipa pathum leh hmeichhia pasarih, kum 15-74 inkar an ni a; an vaiin Mizoram chhunga kái, hri kai ṭanna hriat loh an ni a, pathumin symptom an nei.
December 19-ah swab sample 891 endik a ni a, Covid-19 vei mi 12 hmuh chhuah niin, endik zat aṭangin 1.35% a ni. ZMC laboratory-ah Aizawla mi 408, TrueNAT-PCR hmangin district pasarihah mi 181 leh RAT hmangin district pariatah mi 302 endik a ni. Inrinnia hri vei hmuh thar mi 12-te chu tun hnai aṭanga Mizoram páwn aṭanga rawn lut vek an ni a, tualchhunga kai an awm loh bakah, Covid-19 symptom lang chhuak an awm lo.
DECEMBER 18-A HMUHTE
ZMC-a hmuh chhuah:
Bawngkawn - 2: Mipa kum 26 ve ve, tun hnaia Assam aṭanga rawn lut, symptom nei lo ve ve.
Assam Rifles - 1: Mipa kum 27, tun hnaia Imphal aṭanga rawn lut, 46 AR hmun, Zokhawsanga khung hran lai, symptom nei lo.
TrueNAT-PCR hmanga hmuh:
Ruantlang - 1: Mipa kum 29, Meghalaya aṭanga haw, quarantine facility-a awm lai, symptom nei lo.
Sesih - 1: Mipa kum 31, Delhi aṭanga haw, quarantine facility-a awm mek, symptom nei lo.
Hnahthial - 1: Mipa kum 52, Jharkhand aṭanga rawn lut, home quarantine mek, symptom nei lo.
RAT hmanga hmuhte:
Bawngkawn - 6: Mipa kum 58 leh hmeichhia kum 15, 20, 21, 24 & 50. Hmeichhia kum 20 mi R Dengṭhuama Hall-a endik, symptom nei lo, hri kaina hriat loh. Mi dang zawng chhungkaw khata mi, hri kaina hriat loh; pa ber symptom nei, mi dang zawng symptom nei lo.
Electric Veng - 1: Mipa kum 74, Aizawla damdawi-in pakhata hmuh chhuah, symptom nei, hri kai ṭanna hriat loh.
Zobawk, Lunglei - 1: Hmeichhia kum 30, Aizawl aṭanga haw, hri kàina hriat loh, symptom nei lo.
Lunglei Bazar Veng - 1: Hmeichhia kum 26, Aizawl aṭanga haw, hri kàina hriat loh, symptom nei lo.
Paithar - 1: Mipa kum 67, hri kai ṭanna hriat, symptom nei lo.
DECEMBER 19-A HMUHTE
ZMC-a hmuh chhuah:
Khatla - 1: Mipa kum 36, Silchar aṭanga haw, quarantine facility-a awm mek, symptom nei lo.
TrueNAT-PCR hmanga hmuh:
South Lungrang - 7: Mipa puitling vek, APS Hydro Pvt. Ltd. hnuaia thawk, tun hnaia Bihar aṭanga rawn lut, anmahni camp, South Lungranga khung hran mek, symptom nei lo vek.
Vairengte - 2: Mipa kum 19 leh hmeichhia kum 38. Meghalaya aṭanga haw, quarantine facility-a awm mek, symptom nei lo ve ve.
Kawnpui - 1: Mipa kum 25, Himachal Pradesh aṭanga haw, quarantine facility-a awm lai, symptom nei lo.
RAT hmanga hmuh:
Mimbung - 1: Mipa kum 25, Manipur aṭanga haw, symptom nei lo.