KHAWTHLIR

December 19, Inrinni khan KṬP, Armed Veng Bial chuan Civil Hospital, Aizawl tan thisen unit 59 an pe a, petute mipa 47 leh hmeichhia 12 an ni a; blood bank-a kala thisen pe mi pasarih an awm bawk. ECM KTP, New Siaha Pastor Bial chuan Siaha District Hospital tan thisen unit 40 an pe a, petute mipa 31 leh hmeichhia pakua an ni. Adventist Youth Federation, Champhai South-in District Hospital tan thisen unit 34 an pe a, Baptist HSS, Serkawn-in Christian Hospital tan unit 12 an pe bawk.

Bualhranga lehkhabu ziah 'Khuarei Sulhnu' tih chu Inrinni khan Dawrpui Multipurpose Hall-ah tlangzarh a ni. Bualhranga chuan, "Zofate tan zalenna pumhlum sual chhuah tumin kan rel a, kan sual zui a, kan hnampui kan unaute tam takin an thihphah a, chhungkaw tam takin an tlakchhiat hlen phah a, kan tisual let der a ni. Mizo mipuite hnenah ngaihdam ka dil e. Khawtlang leh mimal tana ka contribution zawng zawng hi Mizo mipuite hnena thiltiha ngaihdam ka dilna a ni. Vawiinah hian ṭawngkam ngeiin Mizo hnam lakah ngaihdam ka dil a ni," a ti. Lehkhabu phek 889-a chhahah hian Mizoram zalenna sual tura ṭhalai rual inbuatsaih dan, a Dumpawl pawl chhuah dan, white paper etc. pehhel nei loin tarlan a ni.

Siaha Officers' Club chuan Inrinni khan Siaha IPR conference hall-ah Krismas thilpek hlan inkhawm an buatsaih. Siaha Officers Club-te hian an sum thawhkhawm Rs. 2,31,000 chu Siaha khawpui chhunga VCP 21 te hnenah an hlan a, anni hian an huam chhunga chhungkaw harsa  5 ṭheuh hnenah Rs. 2,200 ṭheuhin an semve leh ang.

Kolasiba Excise & Narcotics dept. chuan Inrinni khan Rebek Lalchhanhimi, Kolasib Venglai hnen aṭangin grape juice litre 1020, cheng nuai 2 man hu an man. Rebek Lalchhanhimi hi thubuai siamsak niin, grape juice hi Champhai lam aṭanga a lak niin a sawi.

PHE Siaha Watsan Division hnuaia muster roll-a thawk July 10, 2020-a thi lineman Vanlalhuma nupui Lalmuanzovite nufa chenna tur Siaha PHE Staff Welfare ten an sak sak. In sakna atan hian cheng nuai 3 ruahman a ni a, Assam type, square ft 24 a zau a ni.