KHAWTHLIR

Bial hmeichhe inkhawmpui ṭan

Mizoram Presbyterian Kohhran hnuaia Kohhran Hmeichhiate chuan nizan khan pastor bial hrang hrangah bial hmeichhe inkhawmpui an ṭan. Nizan khan palai lawmna leh report pekna hun hman a ni a; vawiin chhunah rorel a ni ang a, naktuk Pathianni zanah inkhawmpui a ṭiak ang.

UPC (NEI)-in sûn

United Pentecostal Church (North East India) superintendent hmasa ber Rev. Harry Ellis Scism (90) s/o Rev. Ellis Luther Scism (L) chu nimin khan Ohio khawpui Columbus-a Mount Carmel East damdawi-inah a thi. UPC (NEI) General Office, district 12 leh Calvary Bible College-ah sûnna hun hman a ni. Rev. Harry E Scism hi kum 1969-1979 chhung UPC (NEI) superintendent a ni a, kum 1970-1974 chhung Calvary Bible College pincipal a ni bawk.

ZMCH zirlai nu leh pate kâwm

Zoram Medical College & Hospital chuan nimin khan MBBS 2024 batch zirlai nu leh pate nena inkawmhona, 'Parent - Teacher Meeting' an nei. Hun khatna chu MEU coordinator leh Paediatrics HoD Prof. F Elizabeth Lalhmangaihzuali'n a kaihruai a, ZMCH director Dr John Zohmingthanga leh registrar Prof. Lalnunmawii Sailo ten thu an sawi. Hun hnihnaah sawihona hun hman niin, zirlai nu leh pate'n an duh dan leh bseiseite an sawi a ni.

Chawimawina hlan

Governor Gen. Vijay Kumar Singh chuan nimin khan Raj Bhavan-ah Assam Rifles 2nd Battalion leh 42nd Battalion-te hnenah hnathawh ṭhat chawimawina, Governor's Unit Citation a hlan.

Sangha dan zirho

Hnahthial District Fisheries Development Office (DFDO) chuan nimin khan Hnahthial Venglai YMA Hall-ah Hnahthial chhehvela tualchhung sangha man ṭhin leh zuartute pualin The Mizoram Fisheries Act 2022 zirhona an buatsaih. DFDO George Lalnuntluanga chuan, tun hmaa eizawnna atana hman ṭhin sanghate chu danin a humhalh tlat tawh thu sawiin, phalna (licence) nei loa lui kal leh sangha zawrh chu dan hmanga man theih an nih thu a sawi.