Republic Day Camp-a telte lawmpui

Governor Gen. VK Singh chuan nimin khan Raj Bhavan-ah Republic Day Camp 2025-a tel Mizo NCC cadet 58-te hmuahna leh lawmpuina a buatsaih a; chief minister Lalduhoma leh Sports & Youth Services minister Lalnghinglova Hmar ten an hmanpui.

Gen. VK Singh chuan, RDC-a Mizoram NCC cadet-te an tel thei chu ropui a tih thu sawiin, Mizorama NCC unit hrang hrangte thawhrimna, inpekna leh rawngbawlnate chhuanawm a tih thu a sawi a, "NCC hian ṭhalaite nunah inthununna, hruaitu zia leh ram hmangaihna a tuh a, ram hruaitu chher chhuaktu pawimawh a ni," a ti.

Mizoramah ṭhalai tam zawkin NCC an zawm a duh thu sawiin Larsap chuan, "NCC Directorate NER hlawhtlinna hi cadet mai bakah, nu leh pate tana chhuanawm tak a ni a, NCC hmalakna reng rengah ram leh hnam dah pawimawh hmasak a ni ṭhin hi entawn tlak a ni," a ti a; NCC chuan ṭhalaite nun a ṭha zawngin a kaihruai thu a sawi.

He hunah hian NCC NE Region additional director general Maj.Gen. Gagan Deep pawhin thu a sawi a; Governor leh Chief Minister ten RDC-a tel NCC cadet-te hnenah chawimawina an hlan a, an tawnhriatte zawtin an kâwm bawk.

Kumina RDC-ah Mizoram aṭangin NCC cadet 58 an tel a, chu'ngte chu - 20 Mizo Bn. NCC Pipe Band cadet 45, 1 Mizo Bn. NCC cadet pahnih, 2 Mizo Bn. NCC cadet pakhat, 1 Mizo Air (Flying) Squadron NCC cadet pathum, Thal Sainik Camp-a tel 20, Mizo Bn. NCC cadet pakhat leh All India Vayu Sainik Camp-a tel 1 Mizo Air (Flying) Squadron NCC cadet paruk an ni.