Ruihhlo do chungchang inzirtir

Social Welfare & Tribal Affairs (SWTA) hnuaia Mizoram Social Defence & Rehabilitation Board (MSDRB) chuan nimin khan an training hall-ah Foundation for Drug-Free Mizorama master trainer-te pualin 'Training on Drug Abuse Prevention' an buatsaih a, SWTA director Dr Lalhriatzuali Ralte-in a hmanpui.

Dr Lalhriatzuali Ralte chuan, ruihhlo avangin Mizoram a ná a, chhungkaw tam tak an ṭap a, khawtlang a tibuai nasa tih sawiin, "Ruihhlo doin sorkar, tlawmngai pawlte leh kohhran te, mimalte'n kan theih ang ngain ke kan pên a, mahse, hma kan lak dan leh tih dan hi ennawn fo a ṭulin a lang," a ti a; ruihhlo ngaite enkawl leh la ti ve lote veng turin theihtawp chhuah zel turin kal khawmte a chah.

Inzirtirnaah hian Foundation for Drug-Free aṭangin mi 12 an tel a; SWTA Director-in training-a telte 'Handbook on Ruihhlo Do' a hlan. MSDRB aṭangin resource person pali - Lalfakawmi, Benjamin Lalṭanpuia, Vanlalhruaii leh Lalrindika ten ruihhlo leh a kaihhnawih thupui hrang hrang an zirtir a ni.