Indo-Bangla ramri endiktute kâwm

India leh Bangladesh ramri chhinchhiahna phun tur leh ramria hnathawh a hmuna enfiahtu India leh Bangladesh aiawhte telna, Indo-Bangladesh Joint Boundary Inspection team (Indo-Bangla Delegate)-te chu February 6, Ningani khan Lunglei district bawrhsap Navneet Mann-i'n Lunglei Circuit House-ah chawchhun eipuiin a kâwm.

Ramri chhinchhiahna lungphun tur leh ramria hnathawh a hmuna enfiah hi February 4-10, 2025 chhunga kalpui tura ruahman a ni a, team-ah hian India leh Mizoram aiawh mi paruk leh Bangladesh aiawh mi pasarih an tel.

India team hi Survey of India hnuaia West Bengal & Sikkim Geo-spatial Directorate-a director Uday Shanker Prasad-a'n a ho a; Bangladesh lam chu surveyor general Brig.Gen. Nur-E-Alam Mohammad Jobayer Sarwar-a'n a ho a ni.

Lunglei DC Navneet Mann chuan, ram pahnih aiawhte chu khumbeu leh khiangkawi ipte a hlan a, "Joint inspection neih mek hian India leh Bangladesh inkarah inrin tawnna leh inpawhna ṭha zawk a thlen ngei ka beisei," a ti a, Bangladesh palaite chu India rama an awm chhungin hun nuam tak hmang turin duhsakna a hlan.

Joint Boundary Inspection hi November 12-14, 2024-a Kolkata-a 45th Joint Boundary Conference thurel bawhzuina a ni. Inspection-ah hian February 4-7 chhungin India ram chhungah endikna kalpui a ni ang a, February 7-10 chhungin Bangladesh ram chhung lam endik a ni ang.