MNF thuchhuah dâwt chiang tak a ni - ZPM Ṭhalai

ZPM Ṭhalai chuan thuchhuah siamin, Sports department hnuaia hmalakna (project) hrang hrangah state sorkar sum hman a ni lo anga MNF party-in an sawi chu dâwt chiang tak a nih thu an tarlang.

ZPM thalaite chuan, December 18, 2020-a press release an siamah, Sports & Youth Services department-in kum 2019 aṭangin state sorkar sum la hmang lo anga an insawi chu dâwt chiang bal a nih thu sawiin, "Kum 2019-20 Supplementary Demand-ah khan cheng nuai 1796.35 zet SYS khan a dil belh a, nuai 144.84 kha Central (CSS) niin a dang zawng nuai 1651.51 kha state sum ngei a ni," an ti.

Cheng nuai 144.84 zinga nuai 50 phei chu Central aṭanga Social Welfare sum dawn tur State Games atan pawh pên a nih thu an sawi bawk. ZPM Ṭhalai tarlan danin, SYS department tân Mizoram sorkar sum, SEDP aṭangin cheng nuai 519.60 dil belh a ni a, chuta ṭang chuan infiamna bungraw leina atan nuai 90 hman a ni. Serchhip Leisekawt Field siamna leh lungbang remna atan cheng nuai 245, Sakawrdai Mini Sports Complex atan nuai 21 eh North Vanlaiphai football field pavillion sakna atan nuai 50 hman a ni bawk. Chu'ng sumte chu Mizoram sorkar sum (SEDP) vek a ni.

MNF party-in an dâwt sawi hliahkhuhna tura dâwt dang an sawi ṭhin an la sim lo chu pawi an tih thu sawiin MNF ṭhalaite chuan, "An thuchhuah hi thu dik hai der a, hre reng chunga dâwt thu ringawt hi an chhuah a nih chuan mipui zah lohna lian takah kan ngai. Khaw êng pawh zah zo loa  mipui bum tumna thil hi tun hnuah thlen nawntir tawh lo turin MNF party kan ngen a ni. Central aṭanga sum hai lût thei bik riau anga Sport Minister a insawi ṭhin pawh hi mipui bumna mai a ni tih a chiang hle a ni," an ti.