Lalrindika'n a rinawm leh awm loh fiah ṭhin turin a bial mipute a fuih

Hachhek bialtu MLA Lalrindika Ralte chuan a bial mipuite chu amah ringtawk tura fuihin, "In lakah ka rinawm em tih leh ka rintlak em tih hi mi fiah ṭhin rawh u," a ti. 

Lalrindika hian tun hnaia a bial chhung khaw ṭhenkhata kum 70 chung lamte thilpek semin, an party-ah mithar a lawmlut nghal a ni. Mithar a lawmluhnaah Hachhek Bialtu MLA chuan mahni hmasialna leh hausak tumna avanga politics a lut a ni lo tih sawiin, "Mizo mipuiin politician tam tak an thinhrik deuh ang chi  ka ni ve lo," a ti a, mi beidawnna siam saktu nih chu Pathian hnena a inhlan dan pawh a nih loh thu a sawi.

Lalrindika Ralte chuan khawvel ram hrang hrangah leh India ram ngeiah pawh miten ram leh hnam hmasawnna atan politics chu hmanraw pawimawh tak, phurna tam tak petu a nih thu sawiin, "Mizoramah politics-in phurna tak tak min pe ve thei ta miah lo hi a pawi a ni. Thusawi thiam avanga mi hneh theih hi ṭha viauin lang mah se, hmangaihna a tel loh chuan hlutna a nei lo a ni", a ti.

Politics chu thiam taka sawi ropui vak chi a ni lo tih sawiin Lalrindika chuan, "Ram leh hnam hmasawnna tura a taka thawhna tur a nih zawk thu leh Mizoramin a mamawh chu a tak taka thawh a ni. Englai mahin mipuite ka phatsan ngai dawn lo. Min ring tawk ula, in lakah ka rinawm em tih leh ka rintlak em tih hi mi fiah ṭhin rawh u," a ti a, ram leh hnam tana nghet taka ding turin mipuite a sawm.