MPF-in mi dik leh rinawm thlang turin mipui chah

Mizoram People Forum (MPF) Gen. Hqrs chuan February 12, 2025-a village vouncil (VC) leh local council (LC) inthlan awm tur atan thuchah an tichhuak a; mi dik leh rinawm thlang turin mipui an chah.

MPF chuan, mi rinawm, therhlo leh eirûkna sum laka inthiarfihlim ngam thlan chhuah an nih theih nan political party mi nihna dah bo a, mi dik leh rinawm thlang turin mipui an sáwm a, "Khawtlang rorelnaah party duh dan aia Pathian duh dan ngai pawimawh tur mi thlang ila. Chhungkhat, vua leh vâng leh ṭhian ṭha nihna dah boin, Pathian ṭih tak tak mi chauh i vote ang u," an ti.

Tualchhung rorelna chu zím angin lang mah se, ram kal zel dan tur hlimthla a nih theih thu tarlangin MPF chuan, "Vote nei tawh phawt chu he inthlannaa vote thlak ngei turin kan ngen," an ti a; mahni khua/veng bik tan pawha khua leh tui mawhphurhna hlen thei lo tan khawtlang hruaitu ṭha neih beisei a rem bik loh tur thu an tarlang.

MPF THUCHAH DANGTE

☑ VC/LC thlan tura candidate zingah sorkar leh kohhran duh loh zawnga sum la lut mi an awm a nih chuan, eng party mi pawh ni se hnualsuat ila, i vote lo ngam ang u.

☑ Kan khawtlangah Pathianin lalna a chan theih nan kan inthlanna boruak hi Pathian dah lal nan i hmang ang u.

☑ Candidate-te pawh Pathian leh mahni lawina kohhran inkaihhruaina aia party hruaitute duh dan dah lal lo zawk ngam turin kan ngen che u.

☑ Khawtlang hruaitu ṭha siam turin i pawimawh a; ṭha teh nan party leh chhungkhat nihna aiin Pathian ṭihna a pawimawh zawk tih i hre ṭheuh ang u.