IAF hnena Airport hlan remti lo

Central YMA hruaitute leh Aizawla YMA branch hrang hrang aiawhte February 7, 2025 zana Vanapa Hall-a kal khawm chuan resolution an siam a; India Air Force (IAF) hnena Lengpui Airport hlan an remtih loh thu an tarlang.

Aizawla YMA hruaitute inhmuhkhawmnaah hian resolution pahnih siam a ni a; "Kan ram ro hlu, Lengpui Airport hi IAF kutah hlan a nih lohna tura CYMA leh NGO Coordination Committee-in hma a lakna hi kan thláwp a, IAF kuta Lengpui Airport hlan hi kan remti lo a ni," an ti.

"Aizawl khawpui lailia awm mek Assam Rifles-te a chhuah hunah an awmna hmun, Lammual leh a chhehvel hi mipui vantlang tana ṭangkai taka hman a nih theih nan leh mimal, pawl, political party leh kohhrante'n remchang la lo tura CYMA hmalakna hi kan thláwp a; theihtawp chhuaha hmalak zel ṭha kan ti," an ti bawk.