Hmunphiah chìnna hmuna lo hâl hun hnuhnung March 31, 2025

Aizawl, Kolasib leh Lawngtlai district-ahte District Level Committee on Fire Prevention-te chuan tun hnai khan an district ṭheuha kângmei vèn hapta hman dan tur an rêl. Lo/huan hâl hun hnuhnung atan March 15, 2025 ruat ni mah se, hmunphiah chìnna hmunte chu March 31 thlengin hâl phalsak an ni.

Aizawl DC Lalhriatpuia hoa ṭhukhawm chuan, Fire Prevention Week hawnna chu February 10, vawiinah Vanapa Hall-ah state pum huapa buatsaih a nih dawn avangin a hranpain Aizawl district bik tan hawnna buatsaih loh an rêl.

March 15, 2025 aia tlai loa lo/huan hâl vek tur leh Lengpui leh a chhehvela lo hâl turte chuan tlai dar 3:30 hnu lamah chauh hâl tura tih chu ṭha taka zawm a nih theih nan hmalak an rél a; Aizawl district-a hmunphiah chìnna hmunte chu March 31, 2025 thlenga hâl phalsak ni se, an ti.

Kângmei ven kawnga hma la ṭha khua thlan chhuahte hnenah lawmman pek relin, hma la ṭhate thlangtu tur an inruat a; Aizawl district-a awareness campaign kalpui dan tur leh ram tikângtu/ kângmei tichhuaktute hrem lek dan turte an rel bawk.

Ṭhutkhawma tarlan danin, kum 2024 chhung khan Aizawl district-ah ram kâng report 354 a awm a, ram kâng huam zau zawng chu hectare 787.58-a zau a ni.

Kolasib-ah chuan bawrhsap Robert C Lalhmangaiha'n ṭhutkhawm a kaihruai a; February 10-15 chhunga Fire Prevention Week hman tur chu February 14, 2025-ah hawn an rel. Ram kâng veng ṭha khuate hnenah lawmman sem an rel a; kângmei ven chungchang inzirtirna chi hrang hrangte kalpui leh ni se, an ti. Hmunphiah hmun neite tan bik March 31, 2025 thleng lo hal theih hun hawn an rêl bawk.

Kolasib district-ah hian kum 2024 chhung khan lo hâl leh a kaihhnawih vangin ram hectare 78.88-a zau a kâng a, hun bituk chhungin lo/huan hâl zawh vek a nih thu tarlan a ni.

Lawngtlai DC conference hall-ah additional DC Zoramsiama Hmar hoin kângmei ven hapta hman dan tur rel a ni a; February 10, chawhma dar 11:30-ah DC Conference Hall-ah hawn ni se, an ti.

Ṭhutkhawmah hian khaw hrang hrang leh raltlante awmna (refugee camp)-ah kângmei laka invenna leh fimkhur inzirtirna (awareness campaign) neih ni se, an ti a; kohhran tinah lehkha pek ni se, Lawngtlai Village Council Association leh CYLA hnenah ngenna siam ni se, hoarding a tam thei ang ber tar ni bawk se, an ti bawk.