KHAWTHLIR

Tuirial constituency bialtu MLA Andrew H Thangliana chuan a bial chhunga YMA branch hrang hrang hnenah February 12, Nilaini khan bungrua/hmanrua chi hrang hrang a hlân. MLA hian a biala YMA branch zawng zawng hnenah bawngtuthlawh, suahdúr, thîrtiang, hruizén leh silpauline pek turin a ruahman a, a thawh khatna atan Nilaini khan Thingdawl, Bualpui, Kawnpui leh Hortoki-a YMA branch-te hnenah an hlan a, nimin khan Zanlawn, Serkhan, Lungdai YMA-te hnenah an hlan leh bawk.

Lengpui khuaa tlawm­ngai pawl hrang hrangte chuan thuchhuah siamin, an khaw ram chhungah sa pêl, sava veh leh dan phal loh hmanraw hmang­a luia nungchate man an remti lo tih an puang. An thuchhuak pawisa loa ti lui man an awm chuan thuneitute hnenah an pek zel tur thu an tarlang.

Nimin khan Kulikawn YMA Hall-ah MUP Aizawl South-II Area Conference vawi 20-na neih a ni a, Champhai North bialtu MLA Dr ZR Thiamsanga, Health & Family Welfare Board vice chairman-in a hmanpui. ZR Thiamsanga chuan, upate an hlut thu sawiin, upate chu an thiamna leh tawn­hriatte ram leh hnam tan pe chhuak zel turin a sáwm a, "Sorkarin The Mizoram Maintenance and Welfare of Parents and Senior Citizens Rules, 2014 hnuaiah upate tan theihtawp a chhuah zel dawn a ni," a ti.

Nupui sât hlum

K Lalthanṭhuama (49), Champhai Vengsanchuan February 12, Nilaini tlai khan a nupui Lalnunziri (48) a sât hlum. K Lalthan-

ṭhuama'n police-te hmaa a sawi danin, a nupui nen an inhau a, a nupuiin a chháng lêt chu thinrimin chempui a la a, a sât a ni. A nupui a sah hnuah K Lalthanṭhuama chu in aṭangin a tlân chhuak a, mipuiin an man hnuah police-in an la a, jail-ah dah a ni. Lalnunziri hi damdawi-in panpui a nih hnuah a hliam tuar loin a thi. K Lalthanṭhuama leh Lalnunziri te hian fa pasarih an nei a ni.