Assembly Emergency Session tan Danpui tihdanglamna tur an pawm

Mizoram Assembly Emergency Session chu nimin khan ṭan a ni a, Good & Service Tax (GST) hman a nih dawn vanga India danpui tihdanglamna tur pawm a ni.

Finance leh Taxation department changtu minister Lalsawta chuan, Parliament House pahnihin GST hman tura an pawm tak avangin India danpui tihdanglam a nih theih nan state sorkarte nemnghehpui tura sorkar laipui ngenna chu House-ah a pu lût a; member-te'n an sawi hnuah member-te chuan lungrual takin an pawm a ni.

Lalsawta chuan, India rama chhiah lak dan chu kum tam tak aṭangin tidanglam tura rawtna a awm tawh thu a sawi a, "Vawi tam tak meeting koh a ni a, hun rei tak buaipui a nih hnuah chinfel niin, Lok Sabha leh Rajya Sabha-ah pawm a ni," a ti.

GST hman thuai a nih theih nan Finance Ministry lamin duh dan an siam tih sawiin Finance Minister chuan, "India danpui tidanglam tur hian state leh union territory zatve talin kan nemnghehpui a ngai a ni," a ti a; Finance Ministry an hmanhmawh avangin Mizoramah pawh emergency session koh a nih thu a sawi.

Finance Minister sawi danin, Finance Ministry chuan September 2016 chawlhkar hmasa berah state leh UT zatve talin GST hman a nih theihna atan India danpui tihdanglam tur nemnghehpui hman se a duh a; September chawlhkar hnihnaah GST Council din a, GST Council chu October thla tawp lamah GST atan dan siam hman tura beisei an ni.

GST atana dan siam chu kumin kum tawp lamah Parliament-a pass hman a, a rang thei anga rules siam a, April 1, 2017 aṭanga GST hmanga chhiah lak hman an duh a ni.

Taxation Minister chuan, GST hman a nih hunah chuan chhiah lakte chu hlawm khata kalin, sorkar laipui leh state sorkarin an inzenṭâwm theih tur thu a sawi a, "State-te tan a hlâwk ang. Checkgate-te a awm a ngai tawh dawn lo a, internet kaltlangin engkim tih vek a ni tawh dawn a ni," a ti.

Nimina Assembly Session-ah hian minister R Lalzirliana put luh, 'The Mizoram Road Fund (Amendment) Bill, 2016' pawh pawm a ni.

Transport minister John Rotluangliana pawhin lirthei neitute'n life time tax an pek dan tihdanglaman tura 'The Mizoram Motor Vehicle Taxation (Amendment) Bill, 2015' siamṭhatna ordinance hmanga kalpui mek, bill-a chantir tur a nih chhan a sawifiah.

Assembly Session hi vawiinah chhunzawm a ni ang a, sorkar thil pawimawhte tih zawh tum niin, session chu tihtawp nghal tum a ni.