MJA-in member thar pali an lalut

Mizoram Journalists' Association chuan Inrinni khan Aizawl Press Club-ah member thar lakluh inkhawm an buatsaih a, MJA president Zonunsanga Khiangte-in MJA member atan mi pali a la lut.

Inkhawm hi MJA vice president Lalremsiama'n kai­hruaiin, Zonunsanga Khiangte chuan member atana lakluh tharte chu pawl tana thawhhlawk tak ni turin a sawm a, "MJA chu Mizoram pumah member 200 vel awrh awmin, working tawh lo member aṭanga paih an awm ve reng bawk nen member an pung chak lo hle," a ti.

MJA President chuan journalist zingah working leh working tawh lo an inthliarfel a ngai tih sawiin, "Working journalist ni thei reng si, ti ṭha duh lote chu an inthen zel a ngai dawn. Khawsak harsatna avanga an dinhmun hriatthiam pui erawh an awm thei,"  a ti a, member aṭanga inpaih chu thil tih hrehawm tak ni mah se, pawl zahawmna humna atan tih a ngaih ṭhin thu a sawi.

Zonunsanga Khiangte chuan Covid-19 vangin journalist-ten harsatna tam tak an tawk tih sawiin, "Kan hnathawh leh eizawnna thlengin a nghawng nasa a, chutihrualin kan chhel tlang em em niin a lang. Hrileng lakah pawh general headquarters hnuai amite chu kan vah tam ngaihtuahin kan la him ṭha tlang niin a hriat a, Pathian venna kan dawng nasa em em a ni," a ti.

MJA member atana lakluh tharte chu CB Thansanga (Newslink, Aizawl), Reuben Lalramchhana (DDK, Aizawl), Laldinpuii (Rihlipui, Champhai) leh Lawmhlira Ralte (DDK, Serchhip) te an ni.