Fire Prevention Week hman ṭan a ni; 2024-ah ram hectare 3,917.74-a zau a kâng

Nimin khan Kângmei Vèn Hapta (Fire Prevention Week) hman ṭan a ni a, Vanapa Hall-ah Environment, Forest & Climate Change secretary H Lalengmawia'n a hawng. Kumin hapta thupui chu 'Kângmei vèn hi kan tu leh fate hmakhua tan a ni' tih a ni. Kum 2024 chhung khan Mizoramah ram kâng 3,612 a awm a, ram hectare 3,917.74-a zau a kâng.

H Lalengmawia chuan, ram kâng tur vèn chu mi tin mawhphurhna a nih thu sawiin, "Mizoram hi India rama ziak leh chhiar thiam tamna a nih angin, dan zawm kawngah entawn tlak ni tura beisei kan ni," a ti a; kângmei vèn kawnga mipui vantlang zirtirna ṭha lehzual a awm theih nan ngaihtuahna seng turin mipui a sáwm.

Fire Prevention Week hi February 10-15, 2025 chhunga hman tur a ni a, hawnna inkhawm hi DFO (Extention) Vanlalnunpuii Hmar-in a kaihruai a; principal chief conservator of forests Ashok Kumar Biswal, additional principal chief conservator of forests Kamal Preet leh chief conservator of forests Arti Chaudhary ten thu an sawi. Conservator of forest Laltlanhlua Zathang kaihhruaiin kal khawmte'n Fire Prevention Week puala thutiam sawi rual a ni.

Environment, Forest and Climate Change department chhinchhiah danin, kum 2024 chhung khan Mizoramah ram kâng 3,612 awmin, ram hectare 3,917.74-a zau a kâng. Ram kâng zinga 116 chu ramngaw kâng niin, hectare 94.5-a zau a kâng a; a bak 3,496 chu lo hâl (jhum cultivation) kaihhnawih niin, hectare 3,823.24-a zau a kâng a ni.

Kângmei Vèn Hapta hi Mizorama district hrang hrangah ahte pawh hawn a ni. Lungleiah chuan J Buana College-a National Service Scheme (NSS) leh Eco Club ṭangho huaihawtin J Buana College multipurpose hall-ah hman a ni a, Lunglei additional DC James Miahlung-in a hmanpui.

Fire Prevention Week hi Mizoramah kum 2000 khan hman ṭan a ni a, kumin hi a ṭum 26-na a ni. Kum 2009 aṭang khan district leh village level fire prevention award sem ṭan a ni a, kuminah pawh award sem leh tum a ni.