KHAWTHLIR

Career guidance

Assam Rifles-te chuan nimin khan Lawngtlai district chhung Sihtlangpui khuaa Jawahar Navodaya Vidyalaya-ah career guidance and counseling programme an buatsaih a, zirlai 220 an tel. He hunah hian zirlai/ṭhalaite tana sipaia luh theih dan te, sipaia ṭan ṭhatna leh hlâwknate an zirtir a ni.

Kawng siam dawn

Temple - Vaivakawn kawng siamṭhat a nih dawn avangin February 11-14, 2025 chhungin zing dar 8 aṭanga tlai dar 4 inkarah Temple-Dinthar pêng inkar kawngpui a chanve khâr ṭhin a ni dawn. Hna thawh chhungin kawng dungah lirthei dah phal a ni lo.

CADC E.Roll thar

Chakma Autonomous District Council (CADC)-a village council thlannaa hman tur electoral roll thar chu nimin khan deputy district election officer Zoramsiama Hmar-in Chawngte SDO (Civil) office-ah a tlangzarh. CADC-ah hian VC 88 a awm a, voter 37,883 awmin, mipa 19,162 leh hmeichhia 18,721 an ni.

AR-in heroin man

Assam Rifles chuan February 8, 2025 khan Zokhawthar leh Melbuk inkarah Myanmar lam mi pakhat hnen aṭangin heroin (no. 4) gram 136 an man a, Zokhawthar Police Station-ah an hlân.

Strong room

Aizawl district election officer Lalhriatpuia, bawrhsap chuan hriattirna chhuahin, LC/VC inthlanpuia inthlanna kaihhnawih bungrua (election material) vawn himna, strong room tur chu State Election Commission hriatpuina leh remtihnain ruat a nih thu a tarlang. Strong room turte chu - Darlawn BDO quarters basement, Thingsulthliah BDO office APO room, Aibawk BDO office conference hall leh Aizawl DC office Strong Room I & II-te a ni.

Silent period

Mizorama district hrang hranga bawrhsapte chuan hriattirna chhuahin, February 12, 2025 Nilainia village council leh local council thlan turah silent period a inṭan tawh a, campaign phal a nih tawh loh thu an tarlang. Silent period chhunga phal loh thilte ti lo turin political party te, candidate-te leh mipui an hriattir a ni.