Larsap hoin Pariksha Pe Charcha chhim

Prime minister Narendra Modi hoin nimin khan Sunder Nursery, Delhi-ah awmze nei zawka exam hmachhawn tura pawimawhte sawihona, Pariksha Pe Charcha vawi 8-na neih a ni. Mizoram aṭangin Governor Gen. Vijay Kumar Singh hoin SCERT conference hall aṭangin zirlai, zirtirtute leh School Education official-te'n video conference hmangin an chhim.

Pariksha Pe Charcha hi exam hmachhawn mai tur zirlaite bakah, zirlai nu leh pa leh zirtirtute tana ruahman a ni a, mi nuai 500 chuang tela chhût a ni. Mizoram aṭanga lo chhimnaah hian Governor-in zirlaite a kâwm a, exam hmachhawnna tura pawimawhte a sawipui.

Gen. VK Singh chuan, naupangte'n mahni pual danglamna an neih vek thu leh mi dangte nena khaikhin vek a rem loh thu a sawi a, "Exam pressure vanga harsatna thlengte'n tawrhna nasa zawk a thlen loh nan ṭanrual a ṭul a, ṭha taka exam hmachhawn turin rilru leh taksa hrisel bakah, ei leh in thlenga uluk a ngai," a ti.

Zirlaite chu hun vawng dik tur leh ruahmanna ṭha siam tura chahin Larsap chuan, nu leh pa leh zirtirtute chu ṭawngkam dawnsawn leh hriat nuam zawk hmang turin a chah a; Pariksha Pe Charcha kaltlanga an thil hmuh leh hriatte chu chhawr ṭangkai tum ṭheuh turin zirlaite a fuih.

Pariksha Pe Charcha chhimnaah hian School Education secretary David Lalthantluanga, SCERT director Caroline Zoramthangi leh Samagra Shiksha project director C Lalthanzira te pawhin thu an sawi. January 24-28, 2025 inkara New Delhi-a Pariksha Pe Charcha chungchang inzirtirna buatsaiha Mizoram aiawha tel St. Paul's Higher Secondary School-a pawl 12 zirlai Lalhriathlui'n a tawnhriatte a sawi bawk.