National Deworming Day hman a ni

Nimin khan ram pumah naupang leh tlairawl kum 1-19 hnena rûlhût hlo pek beihpui thlakna, National Deworming Day (NDD) February Round 2025 hawn a ni a; Mizoram hmun hrang hrangah pawh hawn niin, zirlai/anganwadi naupangte chu rûlhût hlo eitir a ni.

Rûlhût hlo pek beihpui thlak hian rûlhût vanga naupang thisen tlachham leh hrisel lohna hrang hrang vanga harsatna thleng thei tur tihbo chu a tum ber a ni. February Round hi February 10-17 chhunga neih tur a ni a, zirna-in hrang hrangah rûlhût hlo (Albendazole) a huhoa ei a ni dawn a, sikul lut lote chu accredited social health activist (ASHA)-te'n an inah kal chilhin an pe dawn a ni.

Rûlhût hlo ei turte'n an ei vek theih nan leh hmaih an awm loh nan February 17, 2025 khian a thualnawnna (Mop Up Day) hman tum a ni bawk.