Hnam himna ngai pawimawh ber a ngai - ZNP President

ZNP president Lalduhoma chuan, The Mizoram Municipal Act, 2007 chungchangah nimin khan Aizawl Press CLub-ah thurthar thehdarhtute a kawm a, "Hnam himna kan ngaih pawimawh hmasak ber a ngai a, khuareia kan inchhîr lohna ber tur uluk taka zir hmasak a ngai," a ti.

Lalduhoma chuan, village council hnuaia hnam dang vote nei thei lote chu electoral roll-ah paih theih an ni ta lo nia sawiin, "Voter an nih chuan candidate pawh an ni thei si a, hnam dang an pun zel chuan kan chungah roreltu an la ni trhei dawn a ni,” a ti a; sumdawnna thilah pawh Mizote tan inhumhalh bik theih a ni dawn lo niin a sawi.

AMC-in Licensing Regulation 2012 hman a tum vangin tlawmngai pawlte'n an dodal tawh tih sawiin, Duhoma chuan, zir chian phawt a, hmanhmawh loa kalpui a ngai tih a sawi a, "Autonomous district council neih leh mai zawkte a ṭha em?" tiin, hun kal zel tura inchhir lohna turin hnam himna ngaih pawimawh hmasak ber a ṭul thu a sawi a ni.

ZNP President chuan, panchayati raj leh municipality-te chu Mizo hnam tana a him loh dan leh a ṭobulte sawiin, "Prime minister PV Narasimha Rao hun laiin panchayati raj atan 73rd Amendment leh municipality atan 74th. Amendment siam a ni a, December 1992-ah pass a ni," a ti.

Lalduhoma sawi danin, Article 243-M leh 243-ZC in a huam ve loh tur a tarlang a; chungte chu - scheduled area leh tribal area, Gorkha Hills Council hnuaia Darjeeling district-a hill area te, Nagaland, Meghalaya leh Mizoramte a ni.

ZNP President chuan, scheduled area leh tribal area-ah panchayati raj leh municipality hman a nih dawn chuan a nih ang anga hmang loin, her danglam theih a nih thu a sawi a, "Chumi atan chuan Parliament-in dan a siam ang a, chu chu Article 368 hnuaia Constitution amendment anga ngaih tur a ni lo ang tih a ni," a ti.