Bairabi-ah buhfai a thleng ṭha

Bairabi-ah rél lian a luh hnuah buhfai phurtu contractor-te phurh sên loh Mizoramah buhfai a thleng a, tun dinhmunah Bairabi FCI kudamah buhfai quintal 37871.70 leh wheat quintal 7904.46 a awm mek.

Nimin khan buhfai hi Bairabi-ah wagon 42 a thlen belh a, chumi phurh chhuahna atan chuan truck 150 vel mamawh a ni. FCI-a thawktute chuan, buhfai dahna tur kudam a awm tawh loh avang leh contractor-te'n an mamawh khawp truck an neih loh avangin buhfai chu wagon-ah riah a ngai dawn tih an sawi a, "Wagon-ah hian rei tak dah theih a nih dawn loh avangin harsatna tawh mai pawh a hlauhawm," an ti.