AMC executive councillor lak luh a ni Kan chak phah sawt ang - AMC Mayor
Aizawl DC R Lalramnghaka chuan nimin khan Aizawl Municipal Corporation (AMC) executive councillor atan mi pathum a la lut. AMC mayor PC Lalhmingthanga chuan, executive councillor an awm avangin AMC a chak phah sawt tur thu a sawi.
AMC executive councillor atana lak luhte chu - K Romawia (Ward no. III), R Lalbiakthanga (Ward no. X) leh C Lalthansanga (Ward no XIX)-te an ni a; Aizawl bawrhsapin AMC BOC meeting hall-ah rinawmna thu tiamtirin a la lut. Lak luhna inkhawmah hian UDPA changtu deputy chief minister Tawnluia, minister of state Lalruatkima leh MLA pathum - Zothantluanga, C Lalmuanpuia leh Prof. Lalnunmawia te pawh an tel.
Vanglaini palai zawhna chhangin AMC mayor PC Lalhmingthanga chuan, kum 2018 aṭanga MNF kaihhruai state sorkar a pian hnua AMC dan tihdanglam a nih avangin executive councillor nei tura an inpuahchah nghal thu a sawi a, "Budget-ahte sum dah a ni a, mahse, Covid-19 a lên zui tak avangin inlâk luh mai theih a ni lo. Vawiin hi hun remchangah kan ngai a ni," a ti.
Aizawl Mayor chuan, executive councillor an awm chuan AMC a chak phah sawt dawn nia sawiin, "State-ah pawh CM, Dy. CM leh Chief Secretary ringawtin rorel se a chak tâwk lohna a awm ang, minister an awm a ngai. Chutiang bawkin AMC-ah pawh department hrang hrang a awm a, executive councillor an awm a ngai ve a ni," a ti a, executive councillor-te chu an chanpual tur a tihfel vat tur thu a sawi.
AMC official-te hnen aṭanga thu dawn danin, AMC sorkar hi a din tirh aṭangin executive councillor an awm ṭhin a, municipal council a nih avangin dan angin executive councillor pathum an awm ṭhin. AMC sorkar hmasa ber tàwp lamah dan tihdanglam a ni a, executive councillor awm thei ṭhin chu paih a ni.
MNF party-in sorkarna an chan hnuah September 2019-a Legislative Assembly session-ah The Mizoram Municipalities (Amendment) Act, 2019 pass a ni a, December 11, 2019-ah Government Gazette-ah chhuah a ni. AMC dan tihdanglamah chuan, AMC-ah executive councillor pali awm thei tura tih a ni a; hei hi municipal corporation a nih tawh vang a nih thu AMC official-te chuan an sawi.
AMC-ah executive councillor pali an awm theih tawh laia pathum ruat an nih chhan zawhna chhangin AMC hotute chuan, Mayor thu thu a ni a, Mayor-in ruat theih dah kim a duh lêm loh chuan ruat theih zat ruat ngei a ngai kher lo," an ti.
Executive councillor-te dinhmun leh nihnain a ken tel thilte chu a hmaa executive councillor a awm laia mi nen a inan tlangpui thu, AMC official-te chuan an sawi bawk.
AMC term kal mek hi December 10, 2020-a tàwp tur a ni a, Covid-19 léng vangin pawhsei a nih dawn leh dawn loh hriat a la ni lo.