KHAWTHLIR

Traders Meet

State Bank of India (SBI), Regional Business Office chuan Mizoram Merchants Association (MIMA) nen ṭangkawpin nimin khan Aijal Club-ah Traders Meet an buatsaih a; Guwahati-a SBI hotute'n an hmanpui. He hunah hian sumdawng ṭhahnem tak an tel a, Mizorama sumdawnna hmasawn zel dan tur leh bank loan hrang hrangte an sawiho a ni.

Lo zawhsak

Ngopa branch YMA hnuaia Taitesena section chuan tun hnai khan an veng chhunga damlohna vanga hna thawk thei lo chhungkaw pakhat chu an lo an thlawhsak a, lo an zawhsak nghal.

Mamit SP thar

Mamit SP thar Abhishek Dhania, IPS chuan Thawhṭanni khan a hna a zawm. Abhishek Dhania hian police, sorkar hnathawk leh tlawmngai pawlte chu ṭha taka thawhhopuiah a sáwm a, "Hun hlimawm leh ṭha tak kan hmanho ngei ka beisei," a ti.

Fertility camp

AH&Vety department leh State Implementation Unit, NPBB ṭangkawp chuan nimin khan Ser-chhipa AH&Vety dispensary-ah bawng vulhtute tan fertility camp an buatsaih. Ser-chhip khaw chhungah hian bawng vulhtu mi 32 an awm a ni.

Navy la dawn

Mizoram sorkar chuan thuchhuah siamin, September 1, Ningani hian Rajiv Gandhi Stadium-ah lawng sipai, Indian Navy lak a nih dawn thu an tarlang. Navy hi pawl 12 leh a tlukpui leh matriculate zo kum 17-21 inkar tan dil theih a ni.

Lei hawng

Kawlchaw--Phura-Tongkolong inkar kawnga lei (bailey bridge) siam thar chu nimin khan Siaha DC Harleen Kaur leh Pushpak (P) chief engineer KK Razdan ten an hawng. Lei hi ft. 100-a sei niin, lirthei ton 30-a rit zawh thei tura siam a ni a, Border Roads Organisation hnuaia 71 RCC ten an dawh a ni.